واشنگٹن۔ 12اپریل (اے پی پی) واشنگٹن ڈی سی ٹی جہانی بینک و جہانی مالیاتی فنڈ انا سالانہ دیوان برجاءِ، دیوان نا ارٹ میکو دے پاکستانی ڈل وزیر خزانہ اسد عمر نا کماشی ٹی دیوان نا کارروائی ٹی بشخ ہلک۔ پاکستانی ڈل داوخت آ کیہی ہڑتوم آ کنڈآتا اوڑدہی ہم کریر۔ وزیر خزانہ نا کماشی ٹی پاکستانی ڈل ایشیائی شونداری بینک انا صدر ٹاکی ہیکوناکاؤ تون اوڑدہی کرے۔ وزیر خزانہ اودے پاکستان نا کلی معیشت (میکرواکنامک) حالیت آتا بارواٹ ہم معلومدار کرے۔ اوڑدہی ٹی پاکستان و جہانی بینک انا نیام اٹ برجا کمکاری و ڈٹ آتا ہم جاچ ءِ ہلنگا۔ جہانی بینک انا صدر پاکستان اٹی اصلاحات نا عمل نا ستاءِ کرے و دا چرجوئی ٹی اوفتے جہانی بینک انا پورو کمک نا باوری کرفے۔ داکان مست وزیر خزانہ جہانی بینک انا ٹیم اتون اوڑدہی ٹی جہانی بینک اٹی پاکستان نا پورٹ فولیو معاملہ غاتیا گپ و تران کرے۔ جہانی بینک انا ٹیم انا کماشی ءِ سویلی ایشیا کن جہانی بینک انا نائب صدر ہاٹ شیفر کرے۔ اوڑدہی ٹی پاکستان کن جہانی بینک انا بروک آ ڈٹ و پاکستان اٹی چندی بشخ آتا گچینی کن جہانی بینک انا کمک نا بابت معاملہ غاتیا سرجم گپ و تران کننگا۔ وزیر خزانہ نا کماشی ٹی پاکستانی ڈل جہانی بینک انا کثیر الجہتی زرکاری گارنٹی ایجنسی (ایم آئی جے اے) نا ٹیم اتون ہم اوڑدہی کرے۔ ٹیم انا کماشی ءِ ایجنسی نا چیف آپریٹنگ آفیسر ویجے آئر کریکہ۔ دا دیوان اٹی حکومت پاکستان نا نجکاری نا پالیسی و ملک اٹی زرکاری و نجی بشخ انا شریداری فریم ورک اٹی ودکی نا معاملہ غاتا جاچ ءِ ہلنگا۔ ٹیم وزیر خزانہ ءِ ایجنسی و پاکستان نا نیام اٹ کمکاری آن معلومدار کرے و پارے کہ ایجنسی پاکستان اٹی تینا سرجزآتے ودفنگ ءِ۔ وزیر خزانہ امریکی محکمہ خزانہ نا ٹیم اتون ہم اوڑدہی کرے۔ وزیر خزانہ ٹیم ءِ پاکستان نامعیشت نا پورو حالیت، اصلاحات نا عمل و منی لانڈرنگ نا تدارک کن کروک آ گام گیج آتا بارواٹ معلومدار کرے۔ وزیر خزانہ تینا سعودی عرب نا ہم منصب محمد الجدان تون ہم اوڑدہی کرے۔ سعودی وزیر خزانہ وزیر خزانہ اسد عمر ءِ سعودی عرب نا معیشت نا ودوک آ شرح بڑھوتری و سعودی عرب اٹی پاکستانی جوڑ جاڑی ورکرآتے کن روزگار نا وارخواہی تا بارواٹ معلومدار کرے۔
