کوئٹہ۔ 12اپریل (اے پی پی) صوبائی وزیر داخلہ میر ضیاء اللہ لانگو، صوبائی وزیر جان جوڑی میر نصیب اللہ مری ئسک پارینو کہ پاکستان ڈیہہ نا اہم ءُ ملک اس مننگ والا ءِ ہرانا سوب آن دشمن بدامنی تالان کننگ خواہک ولے ننا سیکورٹی فورس آک وطن نا دفاع و شاری تا جان و مال انا رکھ اکن تیار ءُ۔ ہزارگنجی نا خودکش دھماکہ کوئٹہ نا الس کن مون ءُ دے اسے، دہشت گردی نا واقعہ ٹی ٹھپی مروک آتے گچین طبی آسراتی تا فراوانی کن ہسپتال آتے ٹی ایمرجنسی نافذ کننگانے۔ علاقہ نا کمک اٹ سیکورٹی فورس آک بھاز زوت شہید آتا خونی تسکان سرمرسا دہشت گرد آتے اوفتے اوفتا کروک نا سزا تننگک ہزارگنجی ٹی دہشت گردی نا واقعہ ٹی خاص ءُ کمیونٹی اسے ٹارگٹ کننگتنے۔ جلہو نا ہدف ہزارہ، مری بلوچ و سیکورٹی فورس آتاورناک ئسر۔ کوئٹہ سیف سٹی پروجیکٹ آ زوت کاریم نا بناءِ کننگک۔ الس نا جان و مال انا رکھ اکن سیکورٹی فورس آک الرٹ ءُ۔ دشمن نا چم آتے بے سہب کینہ۔ داخیال آتا درشانی ءِ او جمعہ نادے آ ڈپٹی انسپکٹر جنرل پولیس کوئٹہ عبدالرزاق چیمہ تون اوار پریس کانفرنس آن تران کرسا کرے۔ صوبائی وزیر آک پاریر کہ پاکستان ڈیہہ نا اہم ءُ ملک اس مننگ والا ءِ۔ ہرانا سوب آن دشمن بدامنی تالان کننگ خواہک ولے ننا سیکورٹی فورس آک وطن نا دفاع و شاری تا جان و مال انا رکھ اکن تیار ءُ۔ اوپارے کہ ہزارگنجی نا است ہسون واقعہ کوئٹہ کن مون ءُ دے اسے۔ دہشت گردی نا واقعہ ٹی ٹھپی مروک آتے گچین طبی آسراتی تا فراوانی کن ہسپتال آتے ٹی ایمر جنسی نافذ کننگانے۔ الس نا کمک اٹ سیکورٹی فورس آک بھاز زوت شہید آتا خونی تسکان سرمرسا دہشت گرد آتے اوفتے اوفتا کروک نا سزا تننگک۔ صوبائی وزیر آک پاریر کہ ہزارگنجی ٹی مروک آ جلہو خودکش ئس ۔ ہراٹی ہزارہ کمیونٹی، مری بلوچ و ایلوفتے نشانہ کننگانے۔ اسہ سوج اسے نا ورندی ٹی اوپاریر کہ سیکورٹی حالیت آتا جاچ ءِ ہلنگ و آخبت نا حکمت عملی اس پک کننگ کن وزیراعلیٰ جام کمال خان دیوان اس بٹنگانے۔ دہشت گرد آک خلیس و بھیم نا چاگڑد اس ودی کرسا بلوچستان اٹی بدامنی تالان کننگ خوارہ تانکہ صوبہ ٹی برجا شونداری عمل سلے ولے صوبائی حکومت تینا بہادر سیکورٹی فورس و الس نا تین پہ تینی کمکاری اٹ ملک دشمن واک آتا عزم ءِ مش تا کرسا الس نا جان و مال انا رکھ ءِ ہر حال اٹ المی جوڑ کیک۔
