اسلام آباد۔ 12اپریل (اے پی پی) چیئرمین سینیٹ محمد صادق سنجرانی کوئٹہ ٹی ہزارگنجی نا علاقہ سوزی منڈی ٹی مروک آ دھماکہ نا ترند انگا لوز آتے ٹی مذمت ءِ کرسا پارینے کہ دہشت گرد آک ملک انا امن و ایمنی ءِ لتاڑسا تینا گندہ انگا مسخت آتے دوئی کننگ کپسہ۔ اوخودکش دھماکہ ءِ دہشت گرد آتا لغوری کارروائی و شکست کنوک ذہنیت اس گوندا۔ چیئرمین سینیٹ پارے کہ پرامن چاگڑد ءِ خراب کننگ نا چم ءِ ہر حال اٹ بے سہب کروئی مریک۔ دہشت گردی ءِ ملک آن چٹفنگ اولیت ءِ۔ دہشت گردآک ہچ ءُ رعایت اسے نا حقدار افس۔ چیئرمین سینیٹ محمد صادق سنجرانی نہادی جان تا زیان آ ڈکھ و است ہسونی نا درشانی ءِ کرسا صوبائی حکومت ءِ پارت کرے کہ ٹھپی تے درمان نا گچین آسراتی فراوان کے۔ چیئرمین سینیٹ شہید آتا خاہوت تون ہڑزخواہی کرسا اوفتا بخشش و ٹھپی تا زوت جان جوڑی کن دعا ہم کرے۔ ڈپٹی چیئرمین سینیٹ سینیٹر سلیم مانڈوی والا ، سینیٹ اٹی قائد ایوان سینیٹر سید شبلی فراز، سینیٹ اٹی قائد حزب اختلاف سینیٹر راجہ محمد ظفرالحق ئسک ہم دھماکہ نا ترند انگا لوز آتے ٹی مذمت ءِ کرسا شہید آتے کن بخشش نا دعا و ٹھپی تا زوت جان جوڑی کن دعا کریر۔
