اسلام آ باد۔ 11اپریل (اے پی پی) وزیراعظم عمران خان ہندی و درملکی سیل و سواتی تیکن پوسکن آ سیل و سواتی علاقہ غاتا پیدواری و اوفتا بارواٹ سرجم معلومداری تخوک جامع ویب سائٹ اس دمدستی جاری کننگ نا پارت کرینے۔ او داہیت ءِ پنچ شنبے نادے آ سیل و سوات ءِ مون آ دننگ نا بارواٹ دیوان نا کماشی ءِ کرسا تس ہراٹی وزیر اطلاعات و نشریات چوہدری فواد حسین ، وزیراعظم نا خصوصی کمکار سمندر پار پاکستانیز سید ذوالفقار عباس بخاری، چیئرمین زرکاری بورڈ ہارون شریف، وزیر سیل و سوات پنجاب یاسر ہمایوں ، وزیر سیل و سوات خیبر پختونخواعاطف خان و سیکرٹری سیل و سوات خیبر پختونخواراشد محمود لنگڑیاں ئسک ساڑی ئسر۔ وزیراعظم ءِ ملک اٹی سیل و سوات نا مون آ دننگ کن چست کروک آ گام گیج آتا بارواٹ معلومدار کننگا۔ دیوان اٹی پاننگاکہ خیبر پختونخواٹی 11وخت اس کہ پنجاب اٹی 8 سیل و سواتی زون جوڑ کننگ انگ ءِ۔ دا سیل و سواتی علاقہ غاک گبین جبہ،سوات (9200 فٹ بڑزی)، منکیال ، سوات (8700 فٹ بڑزی) ، بیون ، سوات (11000 ہزار فٹ بڑزی) ،بیر مغلشت ، چترال (9000 فٹ بڑزی)،گولین چترال (10400فٹ) ککلشت ، چترال (7500 فٹ) بروائی ، ناران (10000فٹ) و ماہابن بونیر (6600 فٹ) کون آ ہند آتیا جوڑ کننگ انگ ءِ۔ وزیراعظم ءِ خیبر پختونخواٹورازم ایکٹ 2019ء نا مسودہ نا بارواٹ سرجمی اٹ معلومدار کننگا۔ نجی بشخ سیل و سوات نا شونداری ٹی نمان کڑد اس ادا کیک وخت اس کہ حکومت کمک کروک نا حیثیت اٹ سازگار چاگڑد اس فراوان کیک۔ سیل و سواتی زون سیل و سوات نا مون آ دننگ کن جوڑ کننگ انگ ءُ وخت اس کہ داڑتون اوار اوار چاگڑدی سیل و سوات، حیاتیاتی تنوع و سیل و سواتی ریزاٹس نا قدرتی دلکشی ءِ ہم المی کننگک۔ حوال اٹی پاننگاکہ سیل و سواتی تا آسراتی کن کے پی ٹورازم ایکٹ 2019 نا رداٹ پوسکن ءُ گام گیج چست کننگ انگ ءِ و سیل و سواتی بشخ انا لائخی آن پبی فائدہ ہرفنگ انگ ءِ۔ وزیراعظم ءِ پاننگاکہ ملک اٹی سیل وسوات نا مون آ دننگ کن جہانی وڑاٹ سرسہب ماڈل آتا پیروی ءِ کننگ انگ ءِ۔ وزیراعظم پارے کہ پاکستان اٹی سیل و سوات نا بے پناہ وارخواہی ارے۔ اوپارت کرے کہ دمدستی وڑاٹ اسہ جامع ویب سائٹ اس جاری کننگے ہراٹی جوڑ کروک آ غٹ پوسکن آ ٹورسٹ زون تا پیدواریءِ و ہندی و درملکی سیل و سواتی تیکن دا ہند آتا بارواٹ سرجم معلومداری ہم فراوان مرے۔
