اسلام آباد۔ 11اپریل (اے پی پی) صدر مملکت ڈاکٹر عارف علوی پارینے کہ پاکستان و تاجکستان نا نیام اٹ ہڑتوم آ کنڈآتا تعلقداری اسیجا عقیدہ، تاریخ و اقدار تون گنڈوک ءِ، بڑزکو کہول آ باقاعدہ دورہ غاتیان ہڑتوم آ کنڈآتا تعلقداری تا خڑکی نا عکاسی مریک ۔ اوداہیت ءِ تاجکستان نا وزیر دفاع کرنل جنرل شیر علی میر زوف تون گپ و تران کرسا کرے ہراپنچ شنبے نادے آ داڑے اوڑتون اوڑدہی کرے۔ صدر داہیت آ خوشی نا درشانی ءِ کرے کہ ہڑتوم آ ملک آتا دفاعی و سیکورٹی کمامدار آک علاقائی سلامتی کن خڑکی کمک کننگ ءُ و تاجکستان اٹی دفاعی پیداوار کن اسیجا ڈٹ آتا گمان تا جاچ ءِ ہلنگ ءُ۔ اوسیکورٹی و انسداد دہشت گردی نا بشخ آتے ٹی ہڑتوم آ کنڈآتا کمکاری ءِ پین ودفنگ و ٹریننگ نا کمک اٹ اسہ ایلو نا جوان آزموندہ غاتیان فائدہ ہرفنگ نا گرج آ زور شاغا۔ صدر ڈداکٹر عارف علوی دارداٹ اینخو نا سال منشیات نا اسمگلنگ و سجفوک ڈوہ تا کمک اٹ فنانسنگ و دہشت گردی نا توننگ نا بارواٹ جہانی و علاقائی کمکاری نا بابت بڑزکو کہول انا کانفرنس اسے نااڈتننگ کن تاجکستان نا صدر نا گام گیج آتا ستاءِ کرے۔ صدر داہیتءِ تالان کرے کہ ننا ہڑتوم آ کنڈآتا واپار حقی لائخی تون ہم گرنچ اف، اومیت ءِ کہ چندی اسیجا ورکنگ پڑک آک ننا اقتصادی شریداری ءِ سوگوی تننگ اٹ کمکار مریرہ ۔ اوداہیت آ زور شاغا کہ پاکستان کاسا 1000 نا فلیگ شپ ڈٹ انا وخت آ پوروی ءِ بھاز زیات اولیت ایتک۔ ہڑتوم آ کنڈآتے ڈٹ انا عملدرآمدی مرحلہ ءِ ترند کننگ نا گرج ءِ۔ اوپارے کہ ترند تر علاقائی واپار کن نن بایدے سہ جہتی راہداری واپاری معاہدہ ءِ گڈیکو دروشم اس تننگ کن اوغانستان تون اواری اٹ کاریم کین۔ ڈاکٹر عارف علوی پارے کہ پاکستان کم و ود 175 ملک آتے کن ای ویزہ و 50 کن بننگ آ ویزہ نا آسراتی ءِ درستی راستی کرفنگ ءِ۔ اواومیت ظاہر کرے کہ تاجکستان ہم گیشتر رابطہ غاتے کن پاکستانی کاروباری بندغ آتے کن ویزہ نا عمل ءِ آسان کیک۔ اواو آئی سی نا وتواجہ آخبتی انسانی حق کمشنر نا رکنیت کن پاکستان نا اومیتداریت نا مخ تفی نا ستاءِ کرے۔
