اسلام آباد۔ 11اپریل (اے پی پی) وزیر خزانہ اسد عمر نا کماشی ٹی پاکستان نا ڈل جہانی بینک و جہانی مالیاتی فنڈ(آئی ایم ایف) نا ہتم نا دیوان اٹی بشخ ہلک، دیوان اٹی وزیر خزانہ جہانی بینک و آئی ایم ایف نا سینئر عہدیدار آتون اوڑدہی کرے۔ جہانی بینک انا صدر ڈیوڈ مالپاس پاکستان نا حکومت نا کنڈآن اصلاحات نا عمل نا ستاءِ کرسا دا رداٹ جہانی بینک انا کنڈآن کمکاری ءِ برجاتخنگ نا باوری کرفے۔ اوڑدہی ٹی وزیر خزانہ اسد عمر جہانی بینک انا صدر ءِ ملک انا کلی معیشت (میکرواکنامک)نا حالیت آتیان معلومدار کرے و اوڑتون پاکستان و جہانی بینک انا نیام اٹ معاملہ غاتیا گپ و تران کرے۔ وزیر خزانہ جہانی مالیاتی فنڈ(آئی ایم ایف) نا فرسٹ ڈپٹی منیجنگ ڈائریکٹر ڈیوڈ لپٹن تون ہم اوڑدہی کرے و اوڑتون پاکستان و آئی ایم ایف نا نیام اٹ برجامذاکرات نا بابت معاملہ غاتیا گپ و تران کرے۔ وزیر خزانہ اسد عمر پاک یو ایس بزنس کونسل نا باسک آتون ہم اوڑدہی کرے۔ داوخت آ پیپسی کو، کوکاکولا، پراکٹر اینڈ گیمبل ، اوبر و فیس بک انا نمائندہ غاک ہم ساڑی ئسر۔ کمپنیک پاکستانی معیشت و پاکستانی مارکیٹ اٹی بھاز است خواہی ظاہر کریر، اوفک آخبت نا ڈٹ و دارداٹ پاکستان نا حکومت نا کنڈآن درکار کمکاری نا بابت معاملہ غاتیا گپ و تران کریر۔ وزیر خزانہ پارے کہ پاکستان تحریک انصاف نا حکومت ملک اٹی کاروبار ءِ آسان کننگ کن گام گیج کننگ ءِ۔ اوملک اٹی ادارہ جاتی و پنجر جاتی اصلاحات نا بارواٹی ہم معلومدار کرے و پارے کہ وزیراعظم عمران خان اصلاحات نا عمل نا تینٹ چاروکی ءِ کننگ ءِ۔
