ساڑی معاشی شریداری ہڑتوم آ ملک آتے کن اسہ وڑ فائدہ تروک مریک، چینی سفیر
اسلام آباد۔ 11اپریل (اے پی پی) چیئرمین سینیٹ محمد صادق سنجرانی پارینے کہ پاکستان و چین نا نیام اٹ پارلیمانی تعلقداری تا مون آ دننگ آن ہڑتوم آ ملک آتا نیام اٹ دیرینہ دوستانہ رابطہ غاتے پین سوگوی تننگ اٹ کمک رسینگک۔ ہڑتوم آ ملک آتا نیام اٹ پارلیمانی ڈل آتا ہن و بر نا ودکی آن نئے بیرہ مست آن ساڑی راجی ، سیاسی و اقتصادی تعلقداریک پین سوگو مریرہ بلکن آخبت نا پیش بندی ٹی کمک دوئی مریک۔ ایوان بالا نا اسہ بڑزکو کہولی ڈل اس زوت ڈپٹی چیئرمین سینیٹ نا کماشی ٹی چین نا دورہ ءِ کیک وخت اس کہ چین نا نیشنل پیپلز کانگرس نا چیئرمین ءِ پاکستان نا دورہ ءِ کننگ نا سلاہ خلنگانے۔ چیئرمین سینیٹ پارے کہ گوادر اٹی جہانی ایئر پورٹ نا بناءِ کننگ آن گوادر ءِ علاقائی معاشی ہنداسے نا وڑاٹ تالان کننگ اٹ کمک رسینگک و شونداری نا اسہ پوسکن ءُ دور اس بناکیک۔ علاقہ نا شونداری گوادر اٹی ترند تر شونداری عمل و سی پیک ڈٹ آتا زوت پوروی تون گنڈوک ءِ۔ ہڑتوم آ ملک آک دا ڈٹ آتے زوت پورو کننگ و شونداری نا بھرم تے الس اسکان سرکننگ اٹ بھاز است خواہی تخرہ۔ اوپارے کہ پاکستان و چین مدام جہانی کہول آ اہم انگا معاملہ غاتا بابت اسہ وڑ نا موقف اس اختیار کرینو و چین نا کنڈآن پبی سفارتی کمکاری آ نن اونا منت وار اُن۔ پاکستان و چین اسیجا وڑاٹ نیزگاری نا چٹفنگ توانائی و ڈی خوری نا ویل آتا مون ءِ توننگ و کشاری شونداری کن کوشست کننگ ءُ۔ سی پیک نا کمک اٹ شونداری نا پوسکن آ دور انا بنا نئے بیرہ پاکستان و چین نا الس کن فائدہ مند مریک بلکن علاقائی شونداری نا ہم سمت ءِ متعین کیک۔ چین نا سفیر داوخت آ گپ و تران کرسا پارے کہ پاکستان و چین شونداری نا اسیجا ایجنڈاغا عمل کننگ ءُ۔ ہڑتوم آ ملک آتا تعلقداری تاریخ نا ہر آزمائش آ پورو سلیسنو۔ اوپارے کہ ساڑی معاشی شریداری ہڑتوم آ ملک آتے کن اسہ وڑ فائدہ تروک مریک۔ اوپارے کہ چین نا حکومت بلوچستان تون اوار اوار ایلو پدتموک علاقہ غاتے ٹی ہم السی آسراتی نا ڈٹ آتے کن حکومت پاکستان تون پبی کمک کننگ ءِ۔
