اسلام آباد ۔ 8 اپریل (اے پی پی) چیئرمین سینیٹ محمد صادق سنجرانی ءَ گوشت کہ پاکستان جاپان ءِ گوما وتی دودیمی سیادی ءَ باز شرپے چماں چارگ انت ءُُ مئے واھشت انت کہ دوئیں ملکانی میان ءَ دوستی ءِ سیادی ءَ را کثیر الجہتی تک ءَ تاں پراھی دیگ بیت۔ چیئرمین سینیٹ ءَ اے ھیالانی درشان جاپانءِ سفیر کونینورو مٹسوداءِ گوما پارلیمنٹ ہاؤس ءِ تہ دوشمبے ءَ گند ءُُ نند ءِ ساعت ءَ کتگ ات۔ چیئرمین سینیٹ ءَ جاپانی سفیر ءَ را وش اتک کنان ءَ جاپان ءِ حکومت ءِ نیمگا چہ بلوچستان ءِ تہ بندات کتگیں منصوبگانی سرا منت گپتگ ات۔آہاں جاپان ءِ حکومت ءِ نیمگا چہ دادو،خضدارٹرانسمیشن سسٹم ءِ منصوبگ ءِ حال کنان ءَ گوشت کہ 7302ملین جاپانی ین ءِ ھرچ ءَ گوں 275کلومیٹر ٹرانسمیشن لین جنئگ بوھگ انت ایشی ءَ چہ دادو ءُُ خضدار ءِ گرڈ اسٹیشن یک دومیگ ءَ گوں ہمگرنچ بنت وھدیکہ تعلیم ءِ تک ءِ تہ 200 پرائمری تبک ءِ سکولان مڈل ءِ تاں اپ گریڈ کنگ بیت ایشی ءِ ردا سائنس رومز ،ٹیکنیکل ورکشاپس ءِ جوڈ جاڑی ءُُ ضلوری آلات ءِ پھجارگ ءَ را سدکی جوڈ کنگ بیت۔آہاں گوشت کہ جاپانی حکومت ءَ چاگردی ءُُ اقتصادی مراگش ءِ ردا بلوچستان ءِ ھاترا یک مزنیں گرانٹ ءِ ھم منظوری داتگ۔جاپان ءِ حکومت ءَ بلوچستان ءِ مہلوک ءِ زند ءِ معیار ءَ را گہتر کنگ ءِ ھاترا آپ ،ٹیوب ویل ءُُ کھدائی ءِ ھاترا مشین محکمہ آبپاشی ءِ ھوالہ کتگ ات۔آہاں گوشت کہ بلوچستان یونیورسٹی برائے انفارمیشن ٹیکنالوجی ءَ را ھم 200 ملین جاپانی ین ءِ گرانٹ داتگ ات ءُُ یونیورسٹی ءِ لہتیں تک ءَ را نوکتریں آلات پھجاراتگ ات۔آہاں گوشت کہ یونیورسٹی ءِ سول ،مائننگ ءُُ پیٹرولیم ڈپارٹمنٹ چہ 3نودربران برز تکی وانگی ءِ ھاترا جاپان ءَ دیم دیگ بوتگ۔ چیئرمین سینیٹ ءَ بلوچستان ءِ تہ کشت ءُُ کشاری ءِ تک ءَ را گہتر کنگ ءِ ھاترا جاپان ءِ حکومت ءِ نیمگا چہ داتگیں کمک ءِ سرا منت گپتگ ات ءُُ برزی ایوان ءِ افسران ءِ جاپانءِ پارلیمنٹ ءِ تہ ٹریننگ ءِ گاماں را ھم ساڑاتگ۔
