اسلام آباد۔ 05اپریل (اے پی پی) چین اٹی پاکستان نا سفیر مسعود خالد چینی کمپنی تے پاک چین اقتصادی راہداری نا رداٹ جوڑ کروک آ خصوصی اقتصادی زون تیٹی زرکاری نا سلہ خلسا پارینے کہ پاکستان درملکی زرکاری کن جوان ءُ ملک اسے و حکومت درملکی زرکارآتے غٹ آسراتی تے تننگ ءِ۔ اوداہیت ءِ تدوک آ دے چین نا صوبہ شان ڈانگ نا اِرا شار وی ہی و جینان نا سرکاری دورہ ءِ کننگ نا وخت آ گپ و تران کرسا پارے، دادورہ نا بست و بند ءِ شنگھائی کمکار تنظیم نا سیکرٹری جنرل ولادی میر نوروف کریسس ہراٹی شنگھائی کمکار تنظیم نا باسک ملک آتا سفیر آتے بشخ ہلنگ نا سلہ خلنگاسس۔ پروگرام نا رداٹ سفیر آتے شان ڈانگ وی گاؤ پڑک آف کمپنیز و وی ہی ووکیشنل کالج نا دورہ ءِ کرفنگا۔ داوخت آ سفیر آتا شاری انتظامیہ تون اوڑدہی ہم مس۔ پاکستانی سفیر ملک اٹی درملکی زرکاری کن حکومت نا کنڈآن تروک آ آسراتی و ترغیب آتا سرجم ذکر ءِ کرے و پارے کہ اونا ملک سی پیک نا ارٹ میکو مرحلہ ٹی کشت وکشار، خور انا پروسیسنگ ، روزگار نا ڈٹ، دیر انا سفائی ، کسبی تربیت و سیل و سوات خاص کر مذہبی سیل و سوات نا بشخ آتے ٹی کمکاری ءِ اولیت ایتک۔ اوپارے کہ بیجنگ اٹی ایلو بیلٹ اینڈ روڈ فورم اٹی وزیراعظم پاکستان عمران خان بشخ ہلیک۔ پاکستانی سفیر پارے کہ پنجاب و شان ڈانگ اِرا جاڑ انگا صوبہ گوندنگانو و ننے اومیت ءِ کہ ہڑتوم آ ملک آتا ایلو شار تے ہم ہنداوڑ نا درجہ ملک ہراڑان ہڑتوم آ کنڈآتا کمکاری ٹی پین ودکی مریک۔
