کوئٹہ۔ 05 اپریل (اے پی پی) انسپکٹر جنرل بلوچستان پولیس محسن حسن بٹ پارینے کہ ڈوہ تا چٹفنگ نا دنیا پوسکن آ ٹیکنالوجی آ ہنانے، بلوچستان اٹی ڈوہ نا واقعہ غاتا مون ءِ توننگ کن ہم پوسکن آ ٹیکنالوجی ءِ کاریم اٹ اتنگ المی ءِ، بلوچستان پولیس تینا وسیلہ غاتے ٹی مرسا پدریسہ پوسکن آ ٹیکنالوجی ءِ تینا کننگ ءِ چمن و لورالائی آن پد مستونگ اٹی اولیت بنداو تیا سی سی ٹی و ی کیمرہ خلنگانے ہراڑان امن نا بحالی ٹی خاطر خواہ کمک رسینگک ۔ داخیال آتا درشانی ءِ او مستونگ اٹی سی سی ٹی وی پروجیکٹ نا بنائی دود آن تران کرسا کرے ۔ سروک بلوچستان پولیس پارے کہ بلوچستان اٹی امن و دہشت گردی نا چٹفنگ کن پولیس فورس ایلو سیکورٹی ادارہ غاتون اواری اٹ فرنٹ لین آ جنگ کننگ ءِ و وورناک تینا جان تے ندر کرسا صوبہ ٹی پائیدار امن ءِ المی کرینو و صوبہ نا غٹ علاقہ غاتے ٹی امن پدی بسنے و مستین نا نسبت الس است جمی اٹ تینا کاروباری زند اٹی متاماری کننگ ءُ، اوپارے کہ بحیثیت سروک بلوچستان پولیس فورس انا گرج آتے پورو کننگ اولی زمواری و اولیت ءِ بلوچستان پولیس ءِ مون تروک ویل آتیان معلومدار اُٹ دوئی وسیلہ غاتے ٹی مرسا اوفتا ایسری کن پدریسہ گام گیج چست کننگ انگ ءِ مرحلہ وار تھانہ غاتا ماڑی تیٹی گچینی ، پوسکن آ گاڈی تا فراوانی و کسبی فرض انا بجاآوری کن درکار گرج آتے پورو کینہ، اوپارے کہ پولیس نا ورناتا آسراتی کن گام گیج دوئی مالی وسیلہ غاتون گنڈوک ءِ، حکومت بلوچستان لیویز و پولیس ورناتے اپ گریڈیشن نا وعدہ کرینے ولے مالی مشکل آتا سوب آن دا پڑو آ عملدرآمد آتے ٹی مشکلات ءِ اپ گریڈیشن نا حالیت اٹ کم از کم چار ءُ نیم ارب روپئی نا مالی وسیلہ درکار ءِ صوبائی حکومت نا مالی معاملہ غتا گچینی تون ہی زوت ورناتے جوان ءُ خبر اس ملک ، ورناک است جم مریر اوفتا ویل آتیان سماو قربانی تا معترف ءِ ، ورناتا راجی آسراتی نا ڈٹ آتیا وسیلہ غاتارداٹ عملدرآمد کینہ آئی جی پولیس پارے کہ بلوچستان پولیس اٹی آفیسر آتا کمتی ءِ پورو کننگ کن پبلک سروس کمیشن نا کمک اٹ آفیسر آتا براہ راست بھرتی ءِ کننگ انگ ءِ بھرتی نا عمل آن پد صوبہ ٹی شیفکو کہول آ آفیسر آتا کمتی نا ویل ایسر مریک اوپارے کہ بلوچستان اٹی اسہ وڑاٹ پولیس کانود نا نافذ کننگ کن بروک آ پنچ سال اٹی لیویز علاقہ غاتے پدریسہ پولیس اٹی اوار کننگک۔ داکان مست ایس پی مستونگ عنایت اللہ بگٹی سپاسنامہ اس پیش کرے وخت اس کہ مستونگ آ سرمننگ آ بلوچستان پولیس نا چاق و چوبند دستہ سروک بلوچستان پولیس ءِ گارڈ آف آنر و سلامی پیش کریر ۔ دود انا ایسر آ آئی جی پولیس بلوچستان محسن حسن بٹ گچین کارکڑدنشان تروک آ کارندہ غاتے ٹی سند بشخ وپانٹ کرے داوخت آ ڈی سی مستونگ ممیر ممتاز کھیتران تون اوار سول سوسائٹی صحافی و ٹریڈ یونین نا نمائندہ غاک ہم ساڑی ئسر۔
