28ارب 88کروڑ روپئی خڑچ آن پورو مروک آ سروس 25تعلیمی ادارہ، 15ہسپتال و چندی مارکیٹ آتے ملفک
اسلام آباد۔ 24جنوری (اے پی پی) وزیراعظم محمد نواز شریف 18کلومیٹر ملتان میٹروبس سروس نا بنائِ کرے۔ سے شنبے آ وزیراعظم گورنر پنجاب رفیق رجوانہ، وزیراعلیٰ پنجاب محمد شہباز شریف و ایلوفتے تون اوار ملتان میٹروبس سروس نا بنائِ کرے۔ وزیراعظم محمد نواز شریف ملتان میٹروبس سٹاپ چونگی نمبر 9انا دورہ ئِ کرے۔ وزیراعظم محمد نواز شریف میٹروبس سروس آ سفر کرسا آسودہی تا جاچ ئِ ہلک۔ وزیر کانود پنجاب رانا ثناءاللہ و ایلوکمامدارآک ہم اوڑتون اوار ئسر۔ میٹرو بس ملتان اٹی 95ہزار بندغ گچین سفری آسودہی تیان فائدہ ہرفنگ کیرہ۔ 18کلومیٹر مریس میٹرو بس سروس آ 21اسٹیشن جوڑ کننگانے۔ ہر700 میٹرآن پد بس اسٹاپ جوڑ کننگانے، داڑے ای ٹکٹنگ نا نظام رائج مریک وخت اس کہ اونا کرایہ ہڑزان انگا مریک۔ میٹروبس ملتان اٹی 25تعلیمی ادارہ، 15ہسپتال و چندی مارکیٹ آتے ملفک۔ زالبول و معذور بندغ آتے کن داٹی مخصوص نشست آک مریرہ۔ میٹروبس سروس بہاﺅالدین ذکریا یونیورسٹی آن بناءکرسا بوسن روڈ، ہمایوں روڈ، دولت گیٹ، حافظ جمال روڈ، بی سی جی چوک، وہاڑی روڈ آن مرسا چوک کمہاراں آ چٹک۔ داڈٹ آ 28ارب 88 کروڑ روپئی خڑچ بسنے۔ داڈٹ اکن 265کنال ڈغار ہلنگا۔ بنائی وڑاٹ 35بس مسافر آتے سفری آسراتی فراوان کیرہ۔
