اسلام آباد۔ 05اپریل (اے پی پی) صدر مملکت ڈاکٹر عارف علوی ملک اٹی شونداری و شونہالی کن بھلو کچ اسے آ زرکاری نا اہمیت ءِ تالان کرسا پارینے کہ دنیا پوسکن آ ٹیکنالوجی ءِ کاریم اٹ اتسا شونداری نا دوڑاٹی مون آ پیش تمنگ ءِ، ننا ورناک پوسکن آ ٹیکنالوجی ءِ جوان وڑاٹ پہہ مرسا سائنس و ٹیکنالوجی نا بشخ اٹی دوئی وارخواہی تیان پبی بایدے فائدہ ہرفر و ملک انا شونداری ٹی تینا گچین کڑد ءِ ادا کیر۔ داخیال آتا درشانی ءِ او جمعہ نادے آ داڑے ایچ ای سی نا کنڈآن فنی تربیت نا مقابلہ غاتا ایسری دود آن تران کرساکرے۔ صدر مملکت دود و مقابلہ غاتا اڈتننگ آ ایچ ای سی و پنی آ ٹیلی کام کمپنی ’’ہواوے‘‘ ءِ مبارکبادی پیش کرسا پارے کہ ہواوے سائنس و ٹیکنالوجی نا بشخ اٹی خذمت سرانجام تننگ ءِ۔ تعلیم و صنعت نا بشخ آتا نیام اٹ کمکاری ستاکڑزک۔ داوڑنا اواری اٹ کاریم جان جوڑ راج انا جوڑ کننگ اٹ بھاز کمکار مریک۔ صدر ٹیکنالوجی نا بشخ اٹی پیش ہائے رفت ءِ تالان کرسا پارے کہ دنیا ٹی ٹیکنالوجی نا بشخ اٹ چارمیکو انقلاب برپامسنے۔ اوچندی بشخ آتے ٹی ٹیکنالوجی نا کاریم اٹ اتنگ نا اہمیت ءِ مون آ تخسا پارے کہ پاکستان اٹی چندی بشخ آتے ٹی پوسکن آ ٹیکنالوجی نا کاریم اٹ اتنگ ستاکڑزک۔ تدوک آ لس گچین کاری تا اڈتننگ اٹ پوسکن آ ٹیکنالوجی ءِ کاریم اٹ اتنگانے۔ الیکشن کمیشن آئی ٹی نا کاریم اٹ اتنگ آن گچین کاری نا عمل ءِ آسان جوڑ کرے و گچین کاری تیٹی پوسکن آ ٹیکنالوجی نا کمک اٹ رابطہ غاتے آسان کننگا۔ صدر مملکت پارے کہ انٹر نیٹ نا کمک اٹ دنیا اسہ ایلو نا خڑک بننگ ءُ۔ راجی رابطہ غاتا ویب سائٹ آتا کاریم اٹ اتنگ آن تین پہ تینی رابطہ غاتے ٹی آسانی ودی مسنے و آئی ٹی نا کاریم اٹ اتنگ آن ہروڑنا معلومداری سیکنٹ آتے ٹی باآسانی دوئی کننگ مریک۔ اوچین نا مثال ءِ پیش کرسا پارے کہ پارے کہ او ٹیکنالوجی نا بشخ اٹی ترند شونداری کرینے و معاشی وڑاٹ بھاز بھلو واک اس جوڑ مرسا مون آ بسنے۔ صدر پارے کہ پاکستان ءِ پوسکن آ ٹیکنالوجی نا بھرم تیان پبی فائدہ ہرفنگ نا گرج ءِ۔ ملک اٹی شونداری و شونہالی کن بھلو کچ اسے آ زرکاری نا گرج ءِ ۔ صدر داہیت آ زور شاغا کہ پاکستان اٹی زالبول ءِ ہم اسہ وڑ وارخواہی دوئی مننگ ءِ وخت اس کہ آئی ٹی نا کاریم اٹ اتنگ آن اینو نا ورناک اُراٹی تولوک کٹیا کننگ کیرہ۔ اوپارے کہ دنیا پوسکن آ ٹیکنالوجی ءِ کاریم اٹ اتسا شونداری نا دوڑاٹی مون آ پیش تمنگ ءِ۔ اوپارے کہ پوسکن آ ٹیکنالوجی خاص کر انٹرنیٹ کون آ آسراتی ءِ گچین وڑاٹ پہہ مرسا خلقت نا زند اٹی مثبت وڑاٹ بدلی اتنگ مریک۔ اوپارے کہ ننا ورناک خاص کر زالبول آک اُراٹی تولسا پوسکن آ ٹیکنالوجی نا کاریم اٹ اتنگ آن تینا لائخی تے کاریم اٹ اتسا داورخواہی تیان فائدہ ہرفنگ کیرہ۔ دود آن تران کرسا بنجائی وزیر تعلیم شفقت محمود پارے کہ بڑزکو تعلیم ءِ مون آ دننگ اٹ ایچ ای سی نا اہم ءُ کڑد اسے۔ اوپارے کہ تعلیم نا بشخ اٹی ٹیکنالوجی نا کاریم اٹ اتنگ آن ویل آتا دمدستی ایسری مننگ کیک۔ وزیرتعلیم پارے کہ تعلیم نا کمک اٹ شونداری و شونہالی نا دوئی آسان مریک۔ اوپارے کہ چین چندی بشخ آتے ٹی پاکستان تون کمک کننگ ءِ۔ چین نا چندی کمپنیک پاکستان اٹی بھلو کچ اسے آ زرکاری کننگ ءُ۔ اوپارے کہ مقابلہ ٹی سرسہبی دوئی کروک آ ک مبارکباد نا حقدار ءُ۔ اوپارے کہ تعلیم تون اوار اوار غیر نصابی سرجزآک ہم اہم مریرہ۔
