اسلام آباد۔ 04اپریل (اے پی پی) بنجائی وزیر جان جوڑی عامر محمود کیانی نیو اسلام آباد انٹرنیشنل ایئر پورٹ نا دورہ ءِ کرے و ایئر پورٹ آ وزارت جان جوڑی نا ادارہ سینٹرل ہیلتھ اسٹیبلشمنٹ نا رداٹ تروک آ آسراتی تا جاچ ءِ ہلک، خاص وڑاٹ حج اٹی حاجی تے تروک آ آسراتی تا جاچ ءِ ہلک۔ بنجائی وزیر وزیراعظم نا کنڈآن حاجی تے ڈیپارچر آ امیگریشن کلیئر کننگ اٹ ہیلتھ ڈیپارٹمنٹ نا کنڈآن کروک آ بست و بند آتا ہم جاچ ءِ ہلک۔ دورہ ٹی بنجائی وزیر جان جوڑی پارے کہ پاکستان دنیا نا 198 ملک آتیانبار ڈبلیو ایچ او نا انٹرنیشنل ہیلتھ ریگولیشن 2005ء آ عملدرآمد ءِ المی کننگ کن گام گیج کننگ ءِ۔ ایئر پورٹس آ پولیو ویکسینیشن نا نظام ءِ المی کننگ انگ ءِ۔ وزیر جان جوڑی پارے کہ وزارت ہیلتھ چار بھلا ایئر پورٹس اسلام آباد، کراچی ، لاہورو پشاور ایئر پورٹس آ تھرموسکین خلکونے۔ دا گام گیج آتیان ایئر پورٹس آ الس ءِ ہلوک آ ناجوڑی تیان بچفنگ مریک۔ وبائی مرض آتا بین السرحدی تالان مننگ ءِ توننگ کن مربوط حکمت عملی اس تیار کننگ انگ ءِ۔ وزیر جان جوڑی پارے کہ ایئر پورٹس آ یڈیکل نا آسراتی تے اپ گریڈ کننگ انگ ءِ۔ جہانی سیم تا متعدی مرض آتا توننگ کن حکومت پاکستان چین اتون اسہ ایم او یو سے آ دستخط کرینے ہراڑان انٹرنیشنل سیم تیا ناجوڑی تا توننگ اٹ کمک رسینگک۔ خاص وڑاٹ سست بارڈر، کراچی ، اسلام آباد و گوادر نا انٹرنیشنل بارڈر آ متعدی مرض آتا توننگ کن ساڑی جان جوڑی نا آسراتی تے اپ گریڈ کننگک۔ اوپارے کہ متعدی مرض آتا توننگ ملک اکن غٹ ایئر پورٹ آتیا سکریننگ نا نظام ءِ ہم گچین کننگ انگ ءِ و زوت ہی سینٹرل ہیلتھ اسٹیبلشمنٹ نا ویب سائٹ لانچ کننگک ہراڑے انٹرنیشنل مسافر سفر نا بابت معلومداری ہلنگ کیرہ۔
