کشمیر ءِ جیڑہ ءِ سرءَ سرجمیں مسلم یکجاہ اَنت، آجوہی ءِ آشوب گوں طاقتءَ ہلاس کنگ نہ بیت
اسلام آباد۔4اپریل (اے پی پی ) صدر ڈاکٹر عارف علوی ءَ گشتگ کہ کشمیرءِ جیڑہ ءِ سرءَ سرجمیں مسلم اُمہ یک جاہ اِنت، آجوہی ءِ آشوب گوں طاقتءَ ہلاس کنگ نہ بیت، مارا جمہوریتءُ انسانیتءِ درس دیؤک سرپد بہ بنت کہ انسانیت مے میراث اِنت، پاکستان ءَ بھارتءَ را اخلاقی پروش داتگ، دودءُ ربیدگی میراثءِ پلگارگ ءُ گیش کنگ ءُ آؤکیں نسل آں وتی راج دپترءَ چہ سرپد کنگ المی اِنت۔ آ پنچ شمبے ءِ روچءَ کشمیری دودءُ ربیدگ ، میراثءُ اسلامی راج دپترءِ سرحال ءِ سرءَ دوروچی کانگریس ءِ بنگیجی سیشنءَ گوں تران کنگءَ بوتگ۔ اے کانگریس ءِ بندوبست ’’قومی تاریخی و ادبی ورثہ ڈویژن‘‘ او آئی سی ریسرچ سنٹر فار اسلامک ہسٹری آرٹ اینڈ کلچر ءُ آزاد جموں ءُ کشمیر حکومتءِ کمک ءَ چہ کنگ بوتگ۔ مراگشءَ آزاد جموں ءُ کشمیر ءِ صدر سردار مسعود خان، راج دپتر ءُ لبزانکی میراث شفقت محمود، ڈائریکٹر او آئی سی ریسرچ سنٹر فار اسلامک ہسٹری آرٹ اینڈ کلچر پروفیسر ڈاکٹر حلیت ایرن ءُ راج دپتر ءُ لبزانکی ڈویژن ءِ سیکرٹری عامر حسن ءَ ہم تران کتگ۔ صدرءَ کشمیرءِ را ج دپتر ءُ دود ءُ ربیدگ ءِ ہوالگءَ کانگریس برجم دارگءَ ساڑاتگءُ گشتگ کہ اسلامک آرٹ ءُ کیلیگرافی مے خطہ ءِ جلواہ اَنت، بنی آدم ءَ را گوں ازم ءَ چہ جتاہ کنگ نہ بیت۔ آئیءَ گشتگ کہ اسلامو فوبیا ءِ آماچ بوتگیں دنیاسرپد بہ بیت کہ انسانیت مے میراث اِنت۔ ما سالاں چہ اوگان لڑءُ باریانی مہمان جہلی ءَ کنگءَ اَنت، دنیا مارا جمہوریتءُ انسانیتءِ درس ءَ دنت ، پاکستان بہ بیت یا ترکی مسلمان ملکاں مدام لڑءُ باریانی گوں دل ءَ مہمان جہلی کتگ ۔ اے گپءِ سرءَ مارا پھر اِنت۔ صدرءَ گشتگ کہ شدت دوستی ءِ ہوالگءَ ہرچی کہ بھارتءَ بوہگءَ اِنت آ مردماں تکانسری ءِ آماچ کنت۔ سیکولر انڈیاءِ درائیں شعرءُ بانگل دروگ اَنت۔ آئیءَ گشتگ کہ پاکستانءَ بھارتءَ اخلاقی پروش داتگ۔ آئیءَ گشتگ کہ مزن وزیر ءَ بُن چہ سرءَ امنءُ ایمنی ءِ گپ کتگ بلے بھارتءِ نیمگءَ چہ اُرش کنگ بوتگ ءُ پاکستانءَ آئیءَ را ترندیں پسو ہم داتگ ءُ دزگیر بوتگیں بھارتی پائلٹ ءَ را واتر دیم داتگءُ اخلاقی مزنی پیش داشتگ۔ اے موہءَ او آئی سی ءِ سیکرٹری جنرل ءِ کانگریس ءِ ہوالگءَ کلوہ ہم ونتگءُ گوشداریتگ۔ مراگشءَ پروفیسر ڈاکٹر حلیت ایرن ءَ صدرءَ را قرآن پاک ءِ قدیم نسخہ پیش کتگ۔
