ورناتے علم و پٹ وپول آ چکار کرسا ساڑی آ دور انا خواست آتا رداٹ تینے مون تروک چیلنج آتون مون تننگ کن تیار کروئی مریک
اسلام آباد۔ 04اپریل (اے پی پی) صدر مملکت ڈاکٹر عارف علوی ورناخاص کر طالب علم آتیا زور شاغانے کہ او تینا عملی زند اٹی راج انا شونداری کن تینا غٹ لائخی تے کاریم اٹ اتیر، ورناتے علم و پٹ وپول آ چکار کرسا ساڑی آ دور انا خواست آتا رداٹ تینے مون تروک چیلنج آتون مون تننگ کن تیار کروئی مریک، ٹیکنالوجی نا بابت بھلو بدلی اس پیش بننگ ءِ ، دارداٹ پاکستانی ورناتے تینا جوان کڑد ءِ ادا کروئی مریک۔ داخیال آتا درشانی ءِ او پنچ شنبے نادے آ نیشنل یونیورسٹی آف ماڈرن لینگوئجز (نمل) نا 14می کانووکیشن آن تران کرسا کرے۔ صدر مملکت چندی بشخ آتے ٹی ڈگری ہلوک آ طالب علم، اوفتا استاد و لمہ و باوہ غاتے مبارکباد پیش کرسا پارے کہ دا طالب علم آتا سرسہبی خواری تون اوار اوار اوفتا استاد و لمہ و باوہ غاتا کوشست آتا بھرم ءِ، استاد و لمہ و باوہ غاک تعلیم آ چکار کرسا دا طالب علم آتا کڑد سازی ٹی ہم پبی بشخ اس شاغانو و اوفتے راجی قدر اس ہیل تسنو۔ اوپارے کہ نن اللہ تعالیٰ غان ہروخت راست ءُ کسر اس نشان تننگ کن دعا کینہ۔ اللہ تعالیٰ ننے ودی کرینے و اللہ ننا رغ رغ آن واقف ءِ۔ صدر پارے کہ نن 35لکھ اوغان باہوٹ آتے جاگہ تسن و اوفتا مہمانداری ءِ کرین، اینو ہم پاکستان اٹی 20 آن 25لکھ اوغان باہوٹ ساڑی اریر۔ مچ آ قوم و اسہ سیاست دان اس ہم اوغان باہوٹ آتا پاکستان اٹی ساڑی گری نا مخالفت ءِ کتو بلکن انسانی جوزہ نا رداٹ ہروڑ کمک فراوان کریر اونا برعکس گڑاس دیکی ملک آک منہ ہزار پناہ گزین آتے ہم تینا ملک آتے ٹی پترینگ انگ نا موکل تتوس۔ صدر پاک بھارت ساڑی آ بے چیٹ حالیت آتا حوالہ ءِ ترسا پارے کہ بھارت ہراتم پاکستان اٹی جارحیت کرے تو نن صبر و سگ انا درشانی ءِ کرسا امن پسندی نا شاہدی ءِ تسن۔ بھارتی جہاز پاکستانی دنگ اٹ پترینگا تو نن اونا پبی ورندی ءِ تسن ولے جوزہ خیر سگالی نا رداٹ بھارتی پائلٹ ءِ یلہ کرین ہرادا ہیت انا پیدوار ءُ شاہدی اسے کہ پاکستان اسہ امن پسند و زموارءُ ملک اسے۔ صدر پارے کہ پاکستانی سرکڑدہ، فوج و الس نا اسہ وڑ موقف ءِ کہ نن امن خوانہ جنگ آخا ولے ننا دااست خواہی تے نزوری تکنگپ۔ صدر مملکت چندی بشخ آتے ٹی سرسہب مروک آ طالب علم آتے ٹی ڈگری و میڈلز بشخ وپانٹ کرے۔ نمل یونیورسٹی نا ریکٹر میجر جنرل (ر) ضیاء الدین نجم خطبہ استقبالیہ پیش کرسا یونیورسٹی نا سالانہ کارکڑدگی، آخبت نا ڈٹ بندی و شونداری ڈٹ آتا بارواٹ معلومدار کرے۔ اوپارے کہ بروک آ منہ سال اٹی نمل یونیورسٹی نا فیکلٹی ٹی اوار پی ایچ ڈی استاد آتا کچ 300 آن ودک۔ اوپارے کہ سی پیک نا رداٹ گوادر و ارومچی ٹی یونیورسٹی نا کیمپس اس جوڑ کننگانے۔
