سیل و سوات و کلچر اسٹ انگا ذریعہ غاک ءُ ہرافتے مون آ درسا دنیا نا مون آ پاکستان نا اصل عکس ءِ پیش کننگ مریک، حکومت نا کنڈآن ویزہ رجیم اٹی بدلی و درملکی سیل و سواتی تیکن این او سی نا چٹفنگ اسہ سوگو ءُ آئیڈیا اسے، میڈیا دا آئیڈیا نا گچین پریذنٹیشن کن تینا مثبت کڑد ءِ ادا کے
اسلام آباد۔ 03اپریل (اے پی پی) بنجائی وزیر اطلاعات و نشریات چوہدری فواد حسین پارینے کہ سیل و سوات و کلچر اسٹ انگا ذریعہ غاک ءُ ہرافتے مون آ درسا دنیا نا مون آ پاکستان نا اصل عکس ءِ پیش کننگ مریک، ساڑی حکومت نا کنڈآن ویزہ رجیم اٹی بدلی و درملکی سیل و سواتی تے کن این او سی نا چٹفنگ اسہ سوگو ءُ آئیڈیا اسے، میڈیا دا آئیڈیا نا گچین پریذنٹیشن کن تینا مثبت کڑد ءِ ادا کے، اینو نا پاکستان مست انا پاکستان آن بھاز زیات پرامن و رکھوک پاکستان ءِ، امن نا لحاظ اٹ پاکستان نا شار کراچی و لاہور لندن و نیویارک آن ہم جوان ءُ ، ایوی ایشن پالیسی نا منظوری آن پد داسہ گلگت بلتستان ، قطبی علاقہ غاتا سیل و سواتی ہند آتے کن 40 سیٹ انا جہاز و ہیلی کاپٹر سروس آ غٹ خراج آتے چٹفنگانے۔ او چارشنبے نادے آ کنونشن سینٹر اٹی ’’پاکستان ٹوررزم سمٹ‘‘ آن تران کریکہ۔ وزیر مملکت داخلہ شہریار آفریدی، خیبر پختونخوا نا وزیر سیل و سوات عاطف خان، گلگت بلتستان نا وزیر سیاحت فداخان ئسک ہم دانشست اٹی اوار ئسر۔ بنجائی وزیر اطلاعات و نشریات چوہدری فواد حسین پارے کہ پاکستان ءِ 70و 80 نا دہائی تیٹی چندی چیلنج آتا مون تروک ئس ، اوکان پد ہم پاکستان اسہ زیباءُ ملک و سیل و سواتی تیکن است چکوک ءِ۔ اوپارے کہ دنیا ٹی پاکستان نا مثبت دروشم ءِ تالان کرسا سیل وسوات ءِ مون آ دننگ مریک، پوسکن آ حکومت نا بننگ آن جہانی کہول آ پاکستان نا وقار اٹی ودکی مس، ڈیہہ ٹی ساڑی غیر تعلقدار جھیڑہ غاک سیل و سوات ءِ نسخان تسر۔ اوپارے کہ صوبائی وزیرعاطف خان سیل وسوات نا بابت بے کچ پرعزم ءِ و جوان وڑاٹ تینا خذمت ءِ انجام تننگ ءِ، وزیراعظم عمران خان ملک اٹی سیل و سوات ءِ مون آ دننگ ک گام گیج چست کننگ ءِ ، ویزہ رجیم اٹی بدلی ہم ہندانا بشخ اسے، اولیکو وار پاکستان اٹی درملکی تا ہراکہ بشخ آ ہِننگ کن این او سی ءِ چٹفنگانے۔ اوپارے کہ ملک اٹی سیل و سوات نا مون آ دننگ کن میڈیا ءِ تینا بنداوی و اہم کڑد ءِ ادا کروئی مریک، ملک اٹی سیل و سواتی ہند و مثبت سرجز آتے گچین وڑاٹ تینا سکرین آ نشان ایتر تانکہ دنیا ننا ملک انا قدرتی حسن ءِ خنسا پاکستان آ بریر۔ اوپارے کہ پاکستان اٹی اخس کہ سیل و سواتی جاگہ غاک ءُ او شاید پین ملک اسے تون مروئے، اینو ننا آئیڈیہ ہم سوگو ءِ بیرہ اودے جوان وڑ دنیا نا مون آ پیش کروئی ءِ۔ اوپارے کہ پاکستان نا آخبت روشناءِ و سرکڑدہ ہم بے داغ و آخبت نا کنڈا ہُننگ و گام گیج چست کننگ نا پبی لائخی تخک۔ پاکستان اٹی تسلسل اتون دودوربیدگی سرجزآک زور و شور اٹ برجاءُ ، لاہور اٹی دودوربیدگی میلہ برجاءِ ہنداوڑنا میلہ اسلام آباد اٹی ہم کرفنگ خوان۔ وزیراطلاعات و نشریات چوہدری فواد حسین پارے کہ پوسکن آ ایوی ایشن پالیسی بنجائی کابینہ منظور کرینے، داسہ گلگت بلتستان، سکردو، قطبی علاقہ غاتے کن چنکو ایئر کرافٹ و ہیلی کاپٹر سروس نا بناآسان مسنے، غٹ وڑانا خراج آتے چٹفنگانے۔ اوپارے کہ سعودی عرب نا وزارت دودوربیدگ کن وزارت اطلاعات و نشریات نا ایم او یو مسنے، پاکستان سعودی عرب اٹی دودوربیدگی اصلاحات کن پبی کمک کیک۔ خیبر پختونخوانا وزیر سیل و سوات عاطف خان پارے کہ پاکستان نا بابت ہراتاثر مسنے اودے زائل کننگ کن عملی گام گیج چست کننگ انگ ءِ۔ اوپارے کہ مہالو درملکی تیکن ویل ئس کہ شار اسے آ ہِننگ کن اوفتے این او سی ہلوئی تماکہ ولے ساڑی حکومت اسہ بھاز بھلو گام ا س ہرفے و درملکی تیکن این او سی نا شڑت ءِ چٹفے و ملک اٹی جم سیکورٹی حالیت آک ہم گچین ءُ، درملکی سیل و سواتی تے ہروڑنا آسراتی تننگ کن غٹ اسٹیک ہولڈرز آک خواری کننگ ءُ۔ اوپارے کہ تدوک آ 20,25سال اٹی پاکستان دہشت گردی نا برخلاف جنگ اٹی بھاز انگا قربانی تے ترسا امن ءِ قائم کرے ، داسہ نن تینا دودوربیدگ ءِ دا ہند آ دُوارہ اتینہ ہراڑے ننا دودوربیدگ مہالو ئس۔ اوپارے کہ مچ آ ملک اٹی سیل و سوات نا مون آ دننگ کن حکومت الس، سیکورٹی فورسز و ایلو اسٹیک ہولڈرز آتا کوشست آک بایدے برجاسلر۔ گلگت بلتستان نا وزیر سیل و سوات فداحسین پارے کہ گلگت بلتستان اٹی سیل و سوات نا بنداوی پنجر ، روڈ نیٹ ورک انا اپ گریڈیشن ، گلگت بلتستان نا ایئر پورٹ ءِ جہانی و سکردو ایئر پورٹ ءِ کشادہ کننگ و بھلا شاہراہ تیا چندی ہند آتیا ریسٹ ایریا جوڑ کننگ نا گرج ءِ۔ اوپارے کہ ہراسیل و سواتیک اسلام آبادآن گلگت بلتستان و گلگت آن کے پی کے آ ہِننگ خوارہ اوفتے کن غٹ بنداوی آسراتی تا فراوانی بایدے اولیت مرے۔ اوپارے کہ وزیراعظم عمران خان نا کنڈآن سیل و سوات ءِ مون آ دننگ کن ویزہ رجیم اٹی بدلی و درملکی سیل و سواتی تے کن این او سی نا شڑت ءِ چٹفنگ نا فیصلہ ستاکڑزک داڑان ملک اٹی حقی وڑٹ سیل و سوات ءِ مون آ دننگ رسینگک۔
