پاکستان دنیا نا پرامن و رکھوک انگا ریاست ءِ، پاکستان نا اصل عکس ءِ جوان وڑاٹ دنیا نا مون آ تخنگ اُن، مچ آ پاکستان ءِ سیل و سواتی تیکن اوپن کرینن
اسلام آباد ۔ 03اپریل (اے پی پی) وزیر مملکت داخلہ شہریار آفریدی پارینے کہ پاکستان دنیا نا پرامن و رکھ انگا ریاست ءِ، پاکستان نا اصل عکس ءِ جوان وڑاٹ دنیا نا مون آ تخنگ اُن، بیدس’’کلیدی تنصیبات‘‘ نا مچ آ پاکستان ءِ سیل و سواتی تیکن اوپن کرینن، مچ آ دنیا ءِ سلہ ءِ کہ او پاکستان آ بریر و ہریر پاکستان پرامن و رکھ انگا ریاست ءِ ، ملک اٹی امن کن پاک اوغان سیم آ باڑخلنگ انگ ءِ ، ننا کوشست ءِ کہ پاک ایران سیم آ ہم باڑ خلنگے، ملک اٹی سیل و سوات ءِ مون آ دننگ کن ویزہ رجیم اٹی بدلی و این او سی کلچر ءِ چٹفنگانے۔ او چارشنبے نادے آ کنوونشن سینٹر اٹی ’’پاکستان ٹوررزم سمٹ‘‘ آن تران کریکہ۔ بنجائی وزیر اطلاعات و نشریات چوہدری فواد حسین ، خیبر پختونخوا نا وزیر سیل و سوات عاطف خان، گلگت بلتستان نا وزیر سیل و سوات فداخان ئسک ہم دا نشست اٹی شریک ئسر۔ وزیر مملکت داخلہ شہریار آفریدی پارے کہ سیل و سوات ءِ مون آ دننگ کن امن و ایمنی بنداوی حیثیت تخک، دہشت گردی نا برخلاف سرسہب جنگ اٹی اینو امن و ایمنی نا حالیت گچین ءِ، دا غٹ سرسہبی تے نن ٹیم ورک انا وڑاٹ کاریم کرسا دوئی کرینن۔ اوپارے کہ2015ء ٹی ہراتم نن اپوزیشن اٹی ئسن تو ای پارلیمنٹ نا باسک و صحافی تا اسہ ڈل اسے تون اوار بھارت نا دورہ ءِ کریٹ ہراڑے نن کشت وکشار، سیل و سوات، میڈیا نا کڑد و پولیس اصلاحات آتے خناٹ، ہمووخت آ ننتون سیل و سوات نا پالیسی اسکان الوکہ، اوپارے کہ ہراتم ننا حکومت جوڑ مس تو وزیراعظم عمران خان نا اولیت آتے ٹی سیل و سوات ءِ نمان ہنداس دوئی ئس، وزیراعظم عمران خان سیل و سوات ءِ مون آ دننگ کن دے و نن کاریم کننگ ءِ۔ اوپارے کہ سیل و سوات ءِ مون آ دننگ کن امن و ایمنی کلیدی ءُ حیثیت اس تخک ، اولیکو وار ملک انا کلیدی تنصیبات آتا 5آن 10 کلومیٹر نا دنگ آن بیدس مچ آپاکستان بشمول مچ آ ملک انا کینٹونمنٹس آتے ملنگانے، ننا چیلنج ءِ کہ دنیا پاکستان آ برے و ننا پرامن و رکھ انگا پاکستان ءِ ہرے۔ نن ثابت کرین کہ پاکستان اسہ پرامن و رکھوک ءُ ملک اسے۔ اوپارے کہ ملک اٹی امن کن پاک اوغان سیم آ باڑ خلنگ انگ ءِ ، ننا کوشست ءِ کہ پاک ایران سیم آ ہم باڑ خلنگے۔ اوپارے کہ ساڑی حکومت نا سیل و سوات نا مون آ دننگ کن اسہ بھاز بھلو گام اس داہم ارے کہ ویزہ رجیم ءِ بدل کننگانے، 175ملک آتے ای ویزہ 50ملک آتے ویزہ آن آرائیول و بزنس ویزہ تون اوار غٹ وڑنا ویزہ غاتے آسان کننگانے۔ دنیا برے و ہرے کہ پاکستان اسہ زموار ، پرامن و شون ہلوک ءُ ملک اسے۔ اوپارے کہ بروک آ منہ دے اٹی ویزہ آن آرائیول ، ای ویزہ نا آسراتی نا غٹ خواست آک پورو مننگ آن پد مچ آ دنیا نا سیل و سواتی تا ہروڑنا آسراتی دوبریک۔ ننا پوسکن آ ویزہ پالیسی پاکستان اٹی سیل و سوات ءِ مون آ دننگ کن سنجیدہ گام گیج آتیان اسٹ ءِ۔ اواومیت ظاہر کرے کہ پوسکن آ ویزہ پالیسی سیل و سوات ءِ مون آ دننگ اٹ کمکار مریک۔
