حکومت پولیو نا چٹفنگ کن پرعزم ءِ، حکومتی سرکڑدہ ہی ٹی غٹ ادارہ غاک پولیو نا چٹفنگ اٹ اسیجا کڑد ادا کیر
اسلام آباد۔ 03اپریل (اے پی پی) بنجائی وزیر جان جوڑی عامر محمود کیانی پارینے کہ حکومت پولیو نا چٹفنگ کن پرعزم ءِ ، حکومتی سرکڑدہ ہی ٹی غٹ ادارہ غاک پولیو نا چٹفنگ اٹ تینا اسیجا کڑد ءِ ادا کیر۔ داخیال آتا درشانی ءِ او پولیو نا بارواٹی مروک آ حوال اٹی پارینے۔ نیشنل ایمر جنسی آپریشنز سنٹر اسلام آبادآن جاری مروک آ بیان نا رداٹ وزیراعظم نا کمکار پولیو بابر بن عطاء بنجائی وزیر جان جوڑی عامر محمود کیانی ءِ مارچ اٹی مروک آ انسداد پولیو مہم نا سرجم حوال آتیان معلومدار کرسا پارے کہ 25آن 28 مارچ اسکان مروک آ پولیو مہم اٹی ملک انا 97ضلع غاتے ٹی درکار اِراکروڑ چناتے انسداد پولیو نا پڑی کنفنگ نا ہدف اٹی سرسہبی دوئی مسنے۔ اوپارے کہ 22اپریل آن ملک گیر پولیو مہم نا بنامننگ ءِ۔ مہم ءِ سرسہب کننگ کن تیاریک برجاءُ۔ داوخت آ بنجائی وزیر جان جوڑی پارے کہ حکومت نا سرکڑدہ ہی ٹی غٹ ادارہ غاک اسیجا پولیو نا چٹفنگ اٹ تینا کڑد ءِ ادا کیر، تو پولیو آن ہمیشہ ہمیشہ کن جان ءِ چٹفنگ مریک ، جاری مروک آ بیان نا رداٹ کوئٹہ، کراچی و خیبر پختونخوا نا علاقہ غاتے ٹی پولیو آن نمن لمہ و باوہ غاتا کچ ءِ مون آ تخسا اسیجا فیصلہ کننگا کہ اپریل اٹی مروک آ قومی انسداد پولیو مہم اٹی بھلو آگاہی مہم اس چلیفنگک، حوال اٹی سیکرٹری جان جوڑی ، ڈی جی جان جوڑی ، جہانی ادارہ جان جوڑی و یونیسیف نا نمائندہ غاک ہم ساڑی ئسر۔
