اسلام آ باد۔ 03اپریل (اے پی پی) بنجائی وزیر پٹرولیم غلام سرور خان پارینے کہ پی ٹی آئی تینا گچین کاری منشور نا وعدہ ءِ پورو کرسا پٹرولیم ڈویژن نا ذیلی کمپنی تا بورڈ آف ڈائریکٹر آتے پوسکن ٹہیفینے۔ داخیال آتا درشانی ءِ او چارشنبے نادے آ پٹرولیم ڈویژن اٹی اسہ بڑزکو کہول نا دیوان اسے نا کماشی ءِ کرسا کرے۔ اوپارے کہ داکمپنی تیٹی آئل و گیس سیکٹر نا پنی آ شخصیت آتے چیئرپرسن تعینات کننگانے۔ تاریخ اٹی اولیکو وار سوئی سدرن بورڈ انا چیئرپرسن اسہ زالبول اسے۔ ڈاکٹر شمشاد اختر ءِ دا بورڈ انا چیئرپرسن تعینات کننگ نا منظوری ءِ تننگانے۔ او مسکوہی گورنر سٹیٹ بینک ءِ و داکان بیدس اقوام متحدہ ٹی سینئر پوزیشن تیا تینا خذمت آتے سرانجام تسنے۔ دلاور عباس شاہ سوئی ناردرن گیس انا چیئرپرسن نا وڑاٹ خذمت انجام ایتک۔ اونا تیل و گیس انا بشخ اٹی چار دہائی تیا محیط بھلو آزموندہ اسے۔ داکان بیدس او سینیٹر نا وڑاٹ ہم تینا فرض ءِ انجام تسنے۔ قمر شریف ءِ او جی ڈی سی ایل بورڈ انا چیئرپرسن گچین کننگانے۔ اسہ پین نمان پن اس شمس الدین شیخ انا ءِ ہراکہ پاکستان منرل ڈویلپمنٹ کارپوریشن نا چیئرپرسن مریک۔ اوامریکہ غان ایم بی اے و ایم ای انڈسٹریل انجینئرنگ کرینے۔ اواینگرو کارپوریشن اٹی بڑزکو عہدہ غاتیا 28 سال آن زیات خذمت سرانجام تسنے۔ دا غٹ نمائندگی تیٹی داہیت آ خصوصی چکار کننگانے کہ بورڈ آف ڈائریکٹرز نا باسک آک تکنیکی، کانودی صنعتی، بینکاری و مینجمنٹ نا آزموندہ نا حامل مریر تانکہ دا ادارہ غاتے ٹی اصلاحات اتنگ مرے و اوفتا آب ءِ گچین جوڑ کننگ مرے۔
