کوئٹہ۔ 02اپریل (اے پی پی) صوبائی وزیر خزانہ میر محمد عارف محمد حسنی پارینے کہ سرکاری معاملہ غاتا گچین و شفاف وڑاٹ انجام تننگ آن نئے بیرہ حکومتی ادارہ غاتا کارکڑد اٹی ودکی مریک بلکن دا مثبت عمل نا جوان ءُ بھرم اس دوئی مریک ہراڑان ادارہ نا شونداری و نیک نامی ٹی ہم ودکی مریک۔ داخیال آتا درشانی ءِ او تدوک آ دے محکمہ خزانہ نا تدوک آ شش تُو اٹی کارکڑدگی نا جاچ ءِ ہلنگ نا بابت اڈ ہلوک آ دیوان آن تران کرسا کرے۔ داوخت آ دیوان نا بشخ آتے ٹی سیکرٹری خزانہ نور الحق بلوچ، ایڈیشنل سیکرٹری عبدالماجد جاموٹ، غلام نبی لانگو و ایلو آفیسر آک اوار ئسر۔دیوان آن تران کرسا صوبائی وزیر پارے کہ ہرادے آن او محکمہ خزانہ نا قلمدان ءِ سنبھالا ہمودے آن ہی اوعہد کریسس کہ مستین خڑک اٹی صوبہ نا دا اہم محکمہ غاتا ہرا بدنامی مس او بطور وزیر دا محکمہ نا ساکھ نا گچینی نا بابت ہم المی گام گیج کینہ ہراڑان محکمہ خزانہ نا کارکڑدگی گچین مننگ آن صوبہ شونداری نا کسر آ روان مریک۔ اوپارے کہ تدوک آ شش تُو انا سخت کوشست و ٹیم ورک انا نتیجہ ٹی اینو الحمد اللہ محکمہ خزانہ نا شمار صوبہ نا ہمو فعال محکمہ غاتے ٹی مریک ہراڑے روک ٹوک آن بیدس بے خواست سرکاری امور نا انجام دہی کننگ انگ ءِ اوپارے کہ تدوک آ دے تیٹی اسمبلی دیوان اٹی وزیراعلیٰ تون اوار ایلو باسک آک محکمہ خزانہ نا گچین کارکڑدگی نا ستاءِ کریر ہراڑکن محکمہ نا غٹ آفیسر و کارندہ غاک مبارکباد نا حقدار ءُ۔ داوخت آ دیوان اٹی تدوک آ شش تُو آن محکمہ نا کارکڑدگی نا جاچ اتون اوار چندی صوبائی محکمہ غاتے تروک آ شونداری و غیر شونداری فنڈ آتیا ہم شرہ مس۔ دیوان اٹی سال 2018-19 ء نا بجٹ نسخان و بروک آ بجٹ نا بابت چندی اہم معاملہ غاتا جاچ ءِ ہم ہلنگا۔ دیوان نا ایسر اٹی صوبائی وزیر محکمہ خزانہ نا چندی بشخ آتا آفیسر آتون اوفتا بشخ انا کارکڑدگی و مون تروک ویل آتا ہریفے۔
