اسلام آباد۔ 02اپریل (اے پی پی) صدر مملکت ڈاکٹر عارف علوی پارینے کہ تعلیم و معاشی وتواجہی ہی زالبول نا سہی وڑاٹ آجوئی و شونداری نا ضامن ءِ ، زالبول ءِ راج اٹی روا ہند و رکھ ترفنگ قومی زمواری اسے، اوفتا فعال کڑد آن بیدس پوسکن آ پاکستان نا تغ پورو مننگ کپک، او سے شنبے نادے آ ایوان صدر اٹی ینگ ویمن لیڈر شپ کانفرنس آن تران کریکہ۔ صدر مملکت پارے کہ اسلام نیاڑی تے حق و شرف تسنے، نیاڑی تے میرات اٹی بشخ تننگ نا کانود آ عملدرآمد اوفتا معاشی وتواجہی کن بھاز اہم ءِ ہرازالبول نا آجوئی و شونداری نا ضامن ءِ۔ اوپارے کہ چندی بشخ آتے ٹی وارخواہی ودی مننگ ءِ ، دا بابت حکومت آک بایدے کڑد ادا کیر۔ صدر مملکت پارے کہ راج اٹی روا ہند، شونداری، رکھ و وارخواہی نا اعتبار اٹ نیاڑی نا بایدے است بڈی ءِ کننگے، او راج اٹی قائدانہ کڑد اس ادا کننگ کیرہ، دابابت ننا راج اٹی مثال ساڑی ارے۔ اوپارے کہ ہرازالبول آک سرکڑدہ ہی نا ہند آ سرمسنو اوفک پدسلوک و محروم مروک آ زالبو ل آتا گچینی کن بایدے کاریم کیر انتئے کہ جوان ءُ لیڈر اس مننگ کن قابلیت تون اوار اوار خلقت کن ہمدردی و مابت نا جوزہ تخنگ ہم اہم ءِ ، صدر مملکت پارے کہ او میرات تون اوار زالبول آتا حق انا رکھ ، غذائیت، جان جوڑی، سفائی و ستھرائی و شجرکاری نا بابت خلقت اٹی آگاہی ودی کننگ نا چروئی ٹی مبر نا کڑد ءِ ودفنگ کن اسلامی نظریاتی کونسل ءِ چھٹی اس گدریفینن، دانا مسخت اسلام نا راجی شرحالی نا کلہو ءِ لس کننگ و خلقت نا داٹی پبی بشخ ہلنگ ءِ المی جوڑ کننگ نا ءِ۔ اوایچ آر ڈی نیٹ ورک انا کنڈآن ینگ ویمن لیڈر شپ کانفرنس نا سرسہب اڈتننگ نا ستاءِ کرسا منتظمین آتے مبارکباد پیش کرے۔ داکان مست ایچ آر ڈی نیٹ ورک نا چیئرمین رومی سعید حیات کانفرنس نا غرض و مسخت آتے پیش کرسا پارے کہ داٹی مچ آ پاکستان نا غٹ ضلع غاتیان ورنازالبول آک بشخ ہلکر ہراستاکڑزرہ۔ داکانفرنس نا مسخت زالبول آتے راج اٹی اوفتا روا ہند اس ترفنگ نا ءِ ، ننے غٹ بشخ و خاص کر معیشت اٹی زالبول آتا کڑد ءِ ودفوئی مرے۔ داڑکن اوفتا پبی است بڈی ءِ کننگ نا گرج ءِ انتئے کہ ملک انا نیمہ آن زیات آبادی ءِ قومی شونداری نا عمل آن لاتعلق تخنگ مفک، زالبول آتا کڑد ءِ ودفنگ کن اوفتے آسانی و آسراتی تروئی مریک۔ اوایوان صدر اٹی کانفرنس نا اڈتننگ آ صدر مملکت نا منت واریءِ ہرفے۔ داوخت آ ایچ آر ڈی نیٹ ورک نا چیف ایگزیکٹو آفیسر روبیلا بنگش، آکسفیم نا کنٹری ڈائریکٹر محمد قزلباش و پاکستان ویمن کرکٹ ٹیم نا مسکوہی کیپٹن ثناء ممیر ئسک ہم تران کریر و زالبول نا حق و اوفتے راج اٹی روا ہند تننگ نا اہمیت ءِ تالان کرسا دا بابت آگاہی و اجتماعی کوشست آتا گرج آ زور شاغار۔
