اسلام آباد۔ 02اپریل (اے پی پی)صدر مملکت ڈاکٹر عارف علوی پارینے کہ اسلامی نظریاتی کونسل نا اسہ آئینی ءُ ادارہ اس مننگ نا ناطہ سفائی، میرات ، ہیبدار غذا، چناتا ودی کننگ اٹ وقفہ، چاگڑد و دیر انا بچت تون اوار اہم راجی معاملہ غاتیا جتا ءُ کڑد اس تخک۔ اسلام اسہ پورو ءُ ضابطہ حیات اسے، اسلامی نظریاتی کونسل نا پن تینا کلہو اٹی صدر مملکت پارت کرے کہ خواجہ محمد ؑ نا روشنا دور آنبار منبر نا اصل کڑد ءِ الس اسکان سرکننگے۔ صدر مملکت زور شاغاکہ اسلام اسہ پورو ءُ ضابطہ حیات اسے، امام صاحب آک ہر جمعہ غا کمیونٹی تون منبر نا کمک اٹ ہیت کیرہ، گرج دا ہیت انا ءِ کہ او الس نا راہشونی ءِ کیر و اوفتے اہم راجی معاملہ، عبادت، رسم و رواج نا بابت پارت کیر۔ اوپارے کہ سفائی سنت ءِ و داسنت آ عمل کرسا نن چندی مرض آتا مون ءِ توننگ کینہ ہراکہ پاکستان اٹی کل ناجوڑی تا 41درسد ءِ ، دارداٹ دندڑ و وضو نا سنت مثالی ءِ۔ صدر مملکت پارے کہ اسلام اٹی میرات نا پیدوار کانود ءِ و دا کانود آتا خلاف ورزی ءِ کروک آتا ٹھکانہ جہنم گوندنگانے ولے داوخت اسکان زالبول ءِ میرات آن محروم تخنگ انگ ءِ۔ اوپارے کہ بیرہ کانود بس اف بلکن منبرءِ ہم دا کانود آتیا عمل کننگ کن بایدے کاریم اٹ اتنگے۔ صدر مملکت چنک سنی ٹی مسن تا برام ءِ مون آ تخسا پارے کہ داسوب آن اول وئی ٹی حمل نا نتیجہ ہیبدار غذا و نزور نشوونما نا دروشم اٹ پیش تمک۔ او اسلامی نظریاتی کونسل آ زور شاغا کہ او امام صاحب آتے پارت کے کہ او تینا کمیونٹی نا بندغ آتے نزور نشوونما، چناتا ودی کننگ اٹ وقفہ و لمہ نا پال ءِ کُننگ نا بارواٹ راہشونی کیر۔ صدر مملکت پارے کہ اسلام چاگڑد نا رکھ آ زور شاغک و منبر ءِ ساف و سرسوز پاکستان نا حقیقت آن معلومدار کننگ کن کاریم اٹ اتیر، دارداٹ خواجہ ؑ نا حدیث آک بایدے ننا راہشون اصول مریر۔ صدر مملکت اسلامی نظریاتی کونسل ءِ آئین نا آرٹیکل 230 وے اے نا حوالہ ءِ تس ہرا اسلامی نظریاتی کونسل ءِ دا زمواری ءِ ایتک کہ او کانود ساز ادارہ غاتا راہشونی ءِ کے تانکہ پاکستان نا مسلمان تے داقابل و اوفتا است بڈی مرے کہ او تینا انفرادی یا اجتماعی زند ءِ قرآن و سنت نا رداٹ تیر کیر۔ اواسلامی نظریاتی کونسل ءِ سلہ خلک کہ او دا کلہو آتے مون آ تخسا آگاہی کن تینا کڑدءِ ادا کے۔
