اسلام آباد۔یکم اپریل (اے پی پی ) سینٹ ءِ انسانی حکانی فنکشنل کمیٹی ءَ حالءُ احیوال کاری ءُ پی ٹی وی انتظامیہ ءَ را پنتءُ شون کتگ کہ پی ٹی وی ءِ ریٹائرڈ ملازمین آنی کمیوٹیشن بقایاجات ادا کنگءِ زوت گامگیج چست کنگ بہ بیت۔ دوشمبے ءِ روچءَ سینیٹءِ فنکشنل کمیٹی ءِ دیوان چیئرمین سینیٹر ڈاکٹر جہانزیب جمالدینی ءِ سروکی ءَ بوتگ۔ دیوان ءَ حال ءُ احیوال کاریءُ شنگکاری ءِ بنجاہی وزیر چوہدری فواد حسین حاس ہوار بوتگ۔ بنجاہی وزیر چوہدری فواد حسینءَ کمیٹی ءَ را حال داتگ کہ پی ٹی وی انتظامیہ گوستگیں 47روچاں اوشت ءِ آماچ اِنت، پی ٹی وی یونین ءِ دھرنہ ءِ سوبءَ پی ٹی وی ءِ ایم ڈی وتی کارگسءَ شت نہ کنت، اے درائیں جاورحالاں چہ مزن وزیر کارگس سرپد کنگ بوتگ۔ آئیءَ گشتگ کہ پی ٹی وی ءِ ایم ڈی ءِ ھاترءَ اشتہار جاری کنگ بوتگ اَنت کہ ایشیءِ پدءَ 42اُمیت واراں وتی کاگد جم کتگ اَنت، نوکیں ایم ڈی جوڑ کنگءِ سرءَ چارءُ بچار جاری اِنت۔ آئی ءَ گشتگ کہ پی ٹی وی ءِ انوگیں انتظامیہ ادارگءِ کردءَ گہتر کنگءِ ھاترءَ بزنس پلان دیئگءَ ناکام بوتگ ءُ سینیٹ ءُ راجی اسمبلی ءِ کمیٹی ءَ پی ٹی وی ءِ ایم ڈی ءَ را گشتگ کہ آ پی ٹی وی ءِ یونینءَ گوں سولءُ تران بہ کنتءُ جیڑہءَ را گیشءُ گیوار بہ کنت۔ پی ٹی وی ءِ ایم ڈی ار شد علی خان ءَ گشتگ کہ آ پی ٹی وی ءِ یونین ءَ گوں گندءُ نند کنگءُ ادائیگی ءِ جیڑہ ءُ بورڈ ءِ یونین ءَ گوں ہم تپاکی ءِ منظوری ءِ ھاترءَ تیار اِنت۔ حال ءُ احیوال کاری ءُ شنگکاری ءِ سیکرٹری شفقت جلیل ءَ گشتگ کہ پی ٹی وی ملازم آنی پگار ءُ پنشن ءِ اہچ جیڑہ نیست، تنا کمیوٹیشن بقایا جات اَست اَنت کہ گوستگیں حکومتءِ دورایگ اَنت۔
