پاکستان نا آخبت رکھ ءِ ، پوسکن آ پاکستان اٹی بھارتی جارحیت نا پبی ورندی ءِ تننگا
لاہور۔ 01اپریل (اے پی پی) وزیر خارجہ شاہ محمود قریشی پارینے کہ پاکستان نا آخبت رکھ ءِ، پوسکن آ پاکستان اٹی بھارتی جارحیت نا پبی ورندی ءِ تننگا ، داورندی آن دنیا ءِ ہم کلہو ملانے کہ دا پوسکن آ پاکستان ءِ، بھارت ءِ کلہو اس تننگ خواوہ کہ پاکستان نا پوسکن آ چین ءِ چڑیفپیس، انتئے کہ دافک وطن کن کل ءِ ندر کننگ کن تیار ءُ، او تدوک آ دے داڑے یونیورسٹی آف مینجمنٹ اینڈ ٹیکنالوجی نا 17می سالانہ کانووکیشن آن تران کریکہ۔ داوخت آ صدر یوایم ٹی ابراہیم حسن مراد، چیئرمین ڈاکٹر ڈاکٹر احمد عمر، ریکٹر ڈاکٹر محمد اسلم، استاد و طالب علم و اوفتا لمہ و باوہ غاتا بھلو کچ اس ساڑی ئسر۔ وزیر خارجہ پارے کہ تحریک انصاف نا سرسہبی ٹی بھاز بھلو بشخ اس ورناو پیشن نا ملک اٹی رہینگوک آ پاکستانی تا ءِ، داسہ سہی کنڈا ہِننگ و فیصلہ کننگ نا وخت بسنے۔ اوپارے کہ نیشنل ایکشن پلان آ عملدرآمد برجاءِ، دہشت گردی نا برخلاف بے پناہ سرسہبی دوئی کرین، مقبوضہ کشمیر نا ویل بایدے مذاکرات اٹ ایسر مرے، دنیا بدلینگوک آ پاکستان ءِ خننگ ءِ۔ اوپارے کہ مہالو ہزگار تپہ پاکستان نا دولت ءِ پیشن نا ملک آ گدریفیرہ ڈکھ مسکہ ولے داسہ دُن اف، اینو نا ورناتا عزم پین ءِ، ورناتپہ غاک متورہ تو اینو ای سٹیج آ سلوک متوٹہ۔ وزیر خارجہ پارے کہ پاکستان ریجنل امن اٹی اہم ءُ کڑد اس ادا کننگ ءِ، پاکستان دہشت گردی نا جنگ اٹی بے پناہ سرسہبی دوئی کرینے۔ ضرب عضب و ردالفساد اٹی دہشت گرد آتے چٹفینے، شاہ محمود قریشی پارے کہ عمران خان نا پوسکن آ پاکستان نا پالیسی جہانی دنیا ٹی ملک ءِ سوگو کرینے۔ اوپارے کہ ننا ملک اٹی بے شمار قدرتی وسیلہ ارے، ملک اٹی غٹ آن بھلا کشاری نظام ءِ، جہانی دنیا پاکستان اٹی گچین اقتصادی شون ہلک۔ اوپارے کہ پاکستان اوغانستان اٹی امن کن تینا کڑد ءِ ادا کرینے، نن امن کن مذاکرات ءِ اولیت ایتنہ، کشمیر نا ویل انا ایسری ءِ مچ آ ملک خواہک و دا مذاکرات اٹ مننگ کیک، خوانندہ غا خلقت ءِ خنسا گڑتی مریک کہ او پیشن ہنانو، ولے کنا مون آ ہرا طالب علم آک تولوک ءُ داورناتا عزم پین ءِ داورناک پاکستان ءِ ہمو ہند ءِ ایترہ ہرانا تغ ءِ قائد و اقبال خنار، پی ٹی آئی نا سرسہبی ٹی ملک آن پیشن رہینگوک آ و ورناتپہ غاتا اہم ءُ کڑد اسے، ای نما آخبت ناسرسہبی کن دعا کیوہ، وزیر خارجہ پارے کہ شاہدی آ مبنی تعلیم ہی نیزگاری ءِ چٹفنگ اٹ کمکار مریک ۔ اوطالب علم آتے پارے کہ کنا نمے مشورہ ءِ کہ ہندن ءُ تعلیم اس دوئی کبو ہراڑان تیناملک انا خذمت نا جوزہ ودی مرے۔ اوپارے کہ پی ٹی آئی نا حکومت تعلیم آ انحصار کیک و تعلیم ءِ ملک انا شونداری نا ضامن تکک، حیرت ہم و خوشی مس کہ ورناک تینا مچ کروک آتے ملک آ خڑچ کننگ کن تیار ءُ طالب علم آتے خنسا ننے یخین مسنے کہ پاکستان نا آخبت رکھوک ءِ۔ کانووکیشن آن تران کرسا صدر یو ایم ٹی ابراہیم حسن مراد پارے کہ یو ایم ٹی نا شمار ایشیاء نا 500 گچین انگا یونیورسٹی تیٹی مریک ، یوایم ٹی طالب علم آتے گچین کوالٹی ایجوکیشن فراوان کننگ ءِ ، ریکٹر یو ایم ٹی ڈاکٹر محمد اسلم پارے کہ یوایم ٹی ءِ سویلی ایشیا ء نا اولیکو ڈرگ فری یونیورسٹی نا شرف دوئی ءِ، چیئرمین یو ایم ٹی ڈاکٹر احمد عمر پارے کہ یوایم ٹی طالب علم آتے تعلیم تون اوار اوار تربیت ہم تننگ ءِ۔ کانووکیشن اٹی 322بیچلرز، 130ماسٹرز، 283ایم ایس، ایم فل و 4پی ایچ ڈی طالب علم آتے ٹی ڈگری بشخ وپانٹ کننگا۔ کانووکیشن اٹی 5پیٹرن نا کنڈآن گولڈمیڈلز، 5ریکٹرمیڈلز، 6ریکٹر اکیڈیمک ایکسیلنس ایوارڈز و 3سرٹیفکیٹس آف ایکسیلنس ایوارڈز بشخ وپانٹ کننگا۔
