اسلام آباد۔ 01اپریل (اے پی پی) بنجائی وزیر اطلاعات و نشریات چوہدری فواد حسین پارینے کہ مسلم لیگ ن نا دور اٹی آصف علی زرداری آ وڈی خوری نا مقدمہ غاتے جوڑ کننگا ، ن لیگ گچین ءُ جاست و پاست کرے اومیت ءِ کہ داسہ ہم مسلم لیگ ن دا کیس آتے ایسر اسکان سرکننگ کن نیب اتون کمک کیک، بے نظیر انکم سپورٹ پروگرام نا پن ءِ بدل کپننگ اُن بلکن اودے غربت مٹاؤ پروگرام ’’احساس و کفالت ‘‘ نا چھتری نا کیرغ آن اتنگ اُن، نیزگاری نا کچ انا جاچ ءِ ہلنگ کن سروے بناکرینے، ستمبر اٹی سروے نا نتیجہ غاتے جاری کننگک، فوجی عدالت آتا مد اٹی بایدے ودکی مرے، وزیراعظم عمران خان امنائی ودی کننگ کن وزیر خارجہ شاہ محمود قریشیءِ ٹاسک اس تسنے، سخت ءُ فیصلہ ہلسا ملک ءِ نت تیا سلفنگ اُن، او دوشنبے نادے آ داڑے میڈیا تون گپ وتران کریکہ۔ آصف علی زرداری نا برخلاف کیس آتا آخبت نا بابت اسہ سوج اسے نا ورندی ٹی بنجائی وزیر اطلاعات و نشریات چوہدری فواد حسین پارے کہ آصف علی زرداری نا برخلاف مقدمہ غاک ساڑی حکومت نا جوڑکروک ءُ افس ، دا کل کیس آک نواز شریف نا دور اٹی بناکریسر ، 2015ء ٹی زرداری نا برخلاف مقدمہ غاک بناکریسر و 2016ء ٹی ہمو وخت انا وزیر داخلہ چوہدری نثارعلی خان پریس کانفرنس کرسا پاریسس کہ ہراوڑ داکاؤنٹ آتے کاریم اٹ اتنگاسس، بلاول ہاؤس نا خڑچ آک، ایان علی و اوڑتون گنڈوک ایلو خلقت نا ٹکٹ آتے کن ادائیگی ہمواکاؤنٹ آتیان مس، داہیت آک غٹ انا مون آٹی ءُ، پاکستان مسلم لیگ ن نا حکومت آصف علی زرداری نا کیس آتا جوان جاست وپاست ءِ کرے، ننے اومیت ءِ کہ داسہ ہم مسلم لیگ ن دا مقدمہ غاتے مون آ دننگ کن نیب انا مخ تفی ءِ کیک۔ اومیت ءِ کہ زرداری نواز شریف آنبار جیل آ بریک کاہک۔ بے نظیر انکم سپورٹ پروگرام نا پن انا بدلی آ پیپلزپارٹی نا واتوڑ نا بابت سوج انا ورندی ٹی بنجائی وزیر چوہدری فواد حسین پارے کہ بے نظیر انکم سپورٹ پروگرام نا پن انا بدلی داوڑاٹ مفننگ ءِ، بے نظیر انکم سپورٹ پروگرام، زکواۃ و بیت المال ہندن ءُ ادارہ ءُ ہرافتا کمک اٹ حقدار آتے براہ راست فنڈ تننگ ءُ دافتا تینا دنگ اس ئس ولے ساڑی حکومت غربت مٹاؤ پروگرام نا رداٹ احساس و کفالت نا پروگرام اس درستی راستی کرفینے ہراٹی بے روزگار ورناتے وام تننگ، ہرافتے چھت اف اوفتے چھت تننگ ، روزگار و کاروبار نا وارخواہی تننگک۔ داپروگرام بنجائی کہول انا ءِ ہنداخاطران بے نظیر انکم سپورٹ پروگرام بیت المال، زکواۃ نا ادارہ دانا ماتحت کاریم کیرہ۔ اسہ سوج اسے نا ورندی ٹی بنجائی وزیر چوہدری فواد حسین پارے کہ بے نظیر انکم سپورٹ پروگرام نا رداٹ ہر پنچ سال آن پد اسہ سروے اس مریک ، ہراٹی نیزگاری نا کچ ءِ اپ ڈیٹ کینہ، دا سروے بناکرینے ستمبر اٹی دانا نتیجہ غاک بریرہ۔ اسہ سوج اسے نا ورندی ٹی اوپارے کہ بریگیڈیئر (ر) اعجاز شاہ بنجائی وزیر پارلیمانی امور نا زمواری تے سنبھالانے۔ پٹرولیم نا نہاد آتے ٹی ودکی نا بابت اسہ سوج اسے نا ورندی ٹی بنجائی وزیر چوہدری فواد حسین پارے کہ پاکستان اٹی پٹرولیم مصنوعات آتا پیدوار اف ہنداخاطران پٹرولیم مصنوعات نا نہاد آک جہانی کہول انا نہاد آتون گنڈوک ءُ، نواز شریف نا دور اٹی پٹرولیم نا نہاد 38 آن 40 ڈالر فی بیرل بسوسس، داسہ جہانی کہول آ ہم پٹرولیم نا نہاد آتے ٹی ودکی مسنے۔ نواز شریف دور حکومت اٹی پیشن نا وامک 30ٹریلین ڈالر اسکان سرمسر، ننکن آسان ئس کہ نن ہم ہندارفتاراٹ وام ہلوسن ولے وزیراعظم عمران خان نا کماشی ٹی پی ٹی آئی حکومت دن ءُ ہچ ءُ گام گیج اس ہرفتو و ہر وڑنا کوشست کننگاکہ لس بندغ آ بھاریم تمپ۔ فوجی عدالت آتا مد اٹی ودکی نا بابت اسہ سوج اسے ناورندی ٹی وزیر اطلاعات چوہدری فواد حسین پارے کہ ہر ملک تینا ملکی فائدہ غاتے ٹی فیصلہ کیک ، قومی ایکشن پلان نا رداٹ غٹ سیاسی جماعت آتا امنائی اٹ فوجی عدالت آتا قیام عمل اٹ بسوسس، فوجی عدالت آتا سوب دہشت گردی ٹی بھلو حد اسسکان کمتی بسنے۔ اوپارے کہ دہشت گردی نا پورو چٹفنگ کن فوجی عدالت آتا مد اٹی بایدے ودکی مرے، فوجی عدالت آتا مد اٹی ودکی کن امنائی المی ءِ، وزیراعظم شاہ محمود قریشی ءِ دا ٹاسک ءِ تسنے، اگہ امنائی مس تو فوجی عدالت آتا مد اٹی ودکی مریک۔ اوپارے کہ سخت ءُ فیصلہ کرسا پاکستان ءِ تینا نت تیا سلفنگ اُن۔
