اسلام آباد۔ 01اپریل (اے پی پی) قومی احتساب بیورو نا چیئرمین جسٹس (ر) جاوید اقبال پارینے کہ ملک آن وڈی خوری ءِ چٹفنگ و الس نا پلوک آ زرآتے پدی اتنگ نیب انا اولیت ءِ ، نیب وڈی خور عنصر آتیان الس نا پلوک آ کم و ود 303 ارب روپئی نا زردوئی کرسا قومی خزانہ ٹی جمع کرفینے۔ دوشنبے نادے آ داڑے جاری کروک اعلامیہ ٹی اوپارے کہ مضاربہ و مشارکہ سکینڈل آتے ٹی ہزار آ بندغ آتا پلوک آ زر آتا پدی اتنگ کن سنجیدہ گام گیج چست کننگ ءِ و داوخت اسکان 36بھلا دوبہ دارآتے دزگیر کننگانے ہرافتا مقدمہ غاک شرفمند آ احتساب عدالت آتے ٹی زیر سماعت ءُ۔ اوپارے کہ نیب الس نا وڈی خوری تا بابت غاوتا کانود و شاہدی نا رداٹ جاچ ءِ ہلنگ ءِ و وڈی خوری عنصر آتے کانود نا رداٹ ایسر اسکان سرکننگک۔ چیئرمین نیب جسٹس (ر) جاوید اقبال تینا منصب نا زمواری ءِ سنبھالنگ آن پد نیب آفیسر آتیان تران اٹی دا ہیت انا پڑو ءِ کریسس کہ او ہر تُو انا آخیریکو پنچ شنبے آ الس نا وڈی خوری نا بابت غاوتے تینٹ نیب ہیڈ کوارٹر اٹی بنک۔ تینا وعدہ غا عمل کرسا چیئرمین نیب جسٹس (ر) جاوید اقبال ہر تُو انا آخیریکو پنچ شنبے آ نیب ہیڈ کوارٹر اٹی کھلی کچہری اسے ٹی مچ آ ملک آن بروک آ غاو تروک آتا وڈی خوری نا بابت غاوتے بے کچ چکار و است جمی اٹ اسٹ اسٹ آبنک ۔ داکان بیدس چیئرمین نیب انا پارت آ نیب انا غٹ علاقائی دفتر آتا ڈائریکٹر جنرل آک ہر تُو انا آخیریکو پنچ شنبے نادے آ الس نا وڈی خوری نا بابت غاو تے تینا علاقائی دفترآتے ٹی تینٹ بنرہ۔ گیلانی اینڈ گیلپ سروے نا رداٹ 59 درسد الس نیب آ پت انا درشانی ءِ کرینے وخت اس کہ غٹ غاو تروک آک چیئرمین نیب جسٹس (ر) جاوید اقبال نا ملک آن وڈی خوری نا چٹفنگ کن کروک آ کوشست آتا ستاءِ کیرہ۔ نیب انا چیئرمین ملک آن وڈی خوری نا چٹفنگ کن عملی گام گیج آتا سوب تدوک آ اسہ سال اٹی نیب ءِ وڈی خوری نا چٹفنگ کن اسہ متبر ءُ ادار ہ اس جوڑ کرینے ہرانا برملا درشانی ءِ ملکی و درملکی ادارہ غاک ہم تینا رپورٹ آتے ٹی کیرہ۔
