اسلام آباد۔ 01اپریل (اے پی پی) اسپیکر قومی اسمبلی اسد قیصر تون پی ٹی آئی آزاد کشمیر نا صدر بیرسٹر سلطان محمود چوہدری پارلیمنٹ ہاؤس اٹی اوڑدہی کرے و مقبوضہ کشمیر نا ساڑی حالیت، علاقائی سلامتی و تین پہ تینی است خواہی نا معاملہ غاتیا گپ و تران کریر۔ اوڑدہی ٹی گپ و تران کرسا اسپیکر قومی اسمبلی اسد قیصر پارے کہ کشمیر و پاکستان اسہ لازوال ءُ ایلمی و علاقائی دودوربیدگ نا سوب اسہ ایلو تون شہ رگ آنبار ملوک ءُ۔ اوپارے کہ ساڑی حکومت کشمیر نا ویل ءِ جہانی کہول آ تالان کننگ کن سنجیدہ ءِ، کشمیری تا آجوئی نا دے ضرور دے ٹک ایتک ہراڑان سویلی ایشیا ٹی امن بحال مریک۔ داسہ وخت بسنے کہ جہانی برادری کشمیری تا آجوئی کن تینا پبی کڑد ءِ ادا کے۔ اوپارے کہ پلوامہ جلہو مقبوضہ دامان اٹی بھارت نا کنڈآن اسہ منفی ءُ پروپیگنڈا اس ئس، پاکستانی الس و حکومت کشمیری الس تون پورو یکجہتی نا درشانی ءِ کیرہ۔ اوپارے کہ کشمیر اٹی مروک آ ظلم و بربریت نا ترندی اٹ مذمت ءِ کینہ، کشمیر ناویل ءِ اقوام متحدہ نا قرارداد آتے مون آ تخسا ایسر کننگے۔ اوپارے کہ دنیا مقبوضہ کشمیر اٹی انسانی حق آتا لتاڑو کشمیری الس نا کشت و خون نا نوٹس ءِ ہلے۔ بھارت کشمیر نا ویل آن چکار ءِ اسہ کنڈ کننگ کن داوڑ نا چم بازی تے کاریم اٹ اتنگ ءِ۔ اوپارے کہ کشمیر نا ویل انا ایسری آن بیدس ڈیہہ ٹی امن بننگ کپک۔ جہانی فورم آ کشمیر کن ہیت کننگ پاکستان نا نصب العین ءِ و مریک۔ اوپارے کہ آزاد کشمیر نا الس پورو وڑاٹ مقبوضہ دامان نا الس تون سلوک ءُ و اوفتیا مروک آ ظلم و بربریت نا ترند انگا لوز آتے ٹی مذمت ءِ کیرہ۔داوخت آ بیرسٹر سلطان محمود چوہدری پارے کہ کشمیری الس پاکستان نا ساڑی حکومت نا کشمیر نا بارواٹی پالیسی ءِ جہانی کہول آ گچین وڑاٹ تالان کننگ آ حکومت نا ستاءِ کینہ۔ اوپارے کہ بھارت اقوام متحدہ نا قراردادآتا رداٹ کشمیر نا ویل ءِ ایسر کے و ہموڑے برجاکودک کشمیری تیا بیدادی ءِ دمدستی بند کے۔ اوپارے کہ ملک انا سالمیت و بقاء کن مچ آ قوم یکجاءِ و ہر جارحیت نا پبی ورندی ءِ تننگ نا لائخی تخرہ۔ پاکستان نا کنڈآن مقبوضہ کشمیر نا الس تون یکجہتی نا درشان و کشمیر نا ویل انا پرامن ایسری کن کوشست آک ستاکڑزرہ۔
