اسلام آباد۔ 29 مارچ (اے پی پی) صدر مملکت ڈاکٹر عارف علوی ءَ جاپان، تاجکستان ءَ ھوار ھشت جتا جتائیں ملک آنی نامینتگیں سفیر آں وتی وتی سند پیش کت انت وھدیکہ صدرمملکت ڈاکٹر عارف علوی ءَ گوشت کہ پاکستان توامیں دوستیں ملک آنی گوما نزیکیں وت مہ وتی ءِ لوٹوک اِنت۔ جاپان، تاجکستان، گیانا، جمہوریہ سلوینیا، جمہوریہ بینن، برکینافاسو، اوبسٹالک ننسی ایچر ءُُ کانگو ءِ پاکستان ءِ واستہ نامینتگیں سفیر آناں آدینگ ءِ روچ ءَ ایوان ءِ صدر ءَ برجم داشتگیں دیوان ءَ سرٹیفیکٹ پیش کت اَنت۔ ایشی ءَ پد نامینتگیں سفیر آں جتا جتا صدر ءِ مملکت ءَ گوں گند ءُُ نند کت۔ اے موہ ءِ سر ءَ ھیالانی درشان کنان ءَ ڈاکٹر عارف علوی ءَ گوشت کہ پاکستان توامیں دوستیں ملک آنی گوما وتی یکوئی آناں مھکم کنگ لوٹ ایت۔ آئی ءَ زور پر دات کہ مرچی پاکستان گہتر سرمایہ کاری ءُُ کاروباری موہ آنی واستہ جوانیں جاور پجارینگ ءَ انت، جتا جتائیں شوبگ آنی تہءَ سرمایہ کاری ءَ چہ اے موہ ءُُ جاور آں چہ سیت زورگ بوت کنت۔ سفیر آں وتی سفارتی سند صدر ءِ مملکت ءَ را پیش کت، ایشانی تہ ءَ نامینتگیں سفیر کونی نوری متسودا، تاجکستان ءِ نامینتگیں سفری عصمت اولونصریدین، گیانا ءِ بینے کارن، جمہوریہ سلوینیا ءِ کرسٹینا رادج، جمہوریہ بینن ءِ نائم عاقیبو، برکینافاسو ءِ کونی سولیمان، اوبسٹالک ننسی ایچر ءِ نامینتگیں سفیر آرچ بشپ کرسٹوف ذکیہ الخصیص ءُُ کانگو لک جوزف اوکیو ھوار اتنت۔ ایشی ءَ چہ پیسر ایوان ءِ صدر ءَ مزنیں در ءِ دپ ءَ ھمک نامینتگیں سفیر آناں بگی ءِ سر ءَ سوار کنگ بوت ءُُ توک ءَ برگ بوت۔ اے موہ ءِ سر ءَ پاکستان ءُُ سیادی داروکیں ملک آنی راجی سوت الھان کنگ بوت اَنت وھدیکہ نامینتگیں سفیر آناں گارڈآف آنر پیش کنگ بوت۔
