کوئٹہ۔ 29 مارچ(اے پی پی) وزیراعظم عمران خان بلوچستان نا الس نا ویل آتے اوفتا درگہ غا ایسر کننگ کن ہندی حکومت آتا اسہ سوگو نظام ءِ المی گوندسا پارینے کہ ملک ءِ فرسودہ نظام آن کشسا حقی بدلی نا کنڈادننگ اُن ، بروک آ گچین کاری کن آخا ملک انا شونداری نا ایجنڈاغا عمل کننگ اُن، ملک اٹی ہندن ءُ شونداری اس خوانہ ہراڑان مچ آ پاکستان شون ہلے، بلوچستان نا شونداری آن مچ آ ملک شون ہلیک، پاک چین اقتصادی راہداری (سی پیک ) نا دیکی روٹ ءِ ترندی اٹ شونداری تننگ نا گرج ءِ ، بلوچستان نا الس کن پاک فوج و صوبائی حکومت تون اواری اٹ کینسر انسٹی ٹیوٹ اس جوڑ کینہ، کوئٹہ نا پائیدار شونداری کن ماسٹرپلان المی ءِ۔ او جمعہ نادے آ داڑے سی پیک دیکی روٹ اکن 305کلومیٹر کوئٹہ ژوب ڈبل کیرج وے و بلوچستان ہیلتھ کمپلیکس نا سنگ بنداو نا دود آن تران کریکہ۔ وزیراعظم عمران خان پاک فوج انا سروک جنرل قمر جاوید باجوہ ، وزیراعلیٰ ، گورنر بلوچستان تون اوار کوئٹہ ژوب ڈبل کیرج وے و بلوچستان ہیلتھ کمپلیکس نا بنداو ءِ تخا۔ دود آن تران کرسا وزیراعظم عمران خان پارے کہ کنے بھاز خوشی مننگ ءِ کہ بلوچستان اٹی ہندن ءُ وزیراعلیٰ سے ہراتینا خلقت کن است ہشک، داکان مست ہم بلوچستان آ کیہی وار بسوٹ و وزیراعلیٰ تا تقریر آتے ہم بنسا بسونٹ ولے ہراتم کس اس است اٹ ہیت کے تو اثر مریک ، داصوبہ خوش قسمت ءِ کہ داوخت آ داوڑکون ءُ وزیراعلیٰ سے ہرا پاکستان اٹی بدلی نا سوچ اتون مون آ ہِننگ ءِ ۔ اوپارے کہ نن ہراتم پوسکن آ پاکستان نا پانہ داٹی اسہ ہمو سوچ ئس ہرا متکن آ و فرسودہ کسر آ ہناکہ، دا سوچ پین مون آ ہِننگ کتوکہ، متکن آ وڑوڈول آتیا چلینگ انگ نا سوب آن پاکستان کنگال مسوسس۔ اوپارے کہ تدوک آ حکومت کن مروک آ وام تیا ننے ہردے 6ارب روپئی سود ادا کروئی تمنگ ءِ ، ہراوڑ ملک چلینگاکہ اونا مون آ بھس کاری آن بیدس ہچ اس الوکہ۔ اوپارے کہ رکھ، تعلیم، دیر ، جان جوڑی نا بست وبند، روزگار نا وارخواہی الس ناحق و ریاست نازمواری مریک ولے ہراتم ملک بیرہ ایلیٹ کلاس کن جوڑ مرے تو الس نیزگارآن نیزگار تر مریک۔ وزیراعظم عمران خان پارے کہ بلوچستان اسہ اسپیشل ءُ کیس اسے، داڑے سیاست بیرہ گچین کاری تا کٹنگ کن مرسا کرینے، مسکوہی وزیراعظم پنچ سال بلوچستان نا جاگہ غا لندن نا دورہ غاتے کرسا کرے، ہندا خلقت بلوچستان اٹی سیوت کرسا الس نا پیسہ غاتے منہ خلقت اسکان محدود کریر و بدبختی اٹ این ایف سی نا پیسہ غاتے ہم الس آ خلتوس، بلوچستان اٹی بیرہ اسہ چنکو تپہ اس ہی فائدہ دوئی کرسا کرے۔ وزیراعظم عمران خان پاک فوج انا سروک جنرل قمر جاوید باجوہ نا منت واری ءِ ہرفسا پارے کہ اونا جندی کوشست آتا سوب آن یو اے ای نا فنڈنگ آن کوئٹہ ٹی کارڈیک انسٹی ٹیوٹ اس جوڑ کننگانے، داکان مست بلوچستان اٹی کارڈیک انسٹی ٹیوٹ الوکہ، پاک فوج انا سروک ، اونا ٹیم و صوبائی حکومتءِ خراج تحسین پیش کیوہ۔ اوپارے کہ ہمودے مر اف ہراتم دا ڈٹ میڈیکل سٹی اس جوڑ مریک ، کوشست ءِ کہ نن ہم پاک فوج و صوبائی حکومت تون اواری اٹ دا ہیلتھ کمپلیکس تون کینسر انسٹی ٹیوٹ اس جوڑ کین انتئے کہ بلوچستان نا خلقت ءِ کینسر نا درمان کن لاہور آ ہنوئی تمک ہراکہ اسہ مشکل ءُ کاریم اس ئس۔ اوپارے کہ کینسر و است انا مریض آتے کن چاہندار ڈاکٹر، پوسکن ءُ ا زباب و انجینئرز آتا گرج مریک داڑکن نن پلاننگ کننگ اُن ۔ وزیراعظم عمران خان پارے کہ پاک چین اقتصادی راہداری (سی پیک) نا دیکی روٹ اکن 305کلومیٹر کوئٹہ آن ژوب کون آ ڈٹ ہی حقی بدلی اتیک، بلوچستان کن دا جوان ءُ ڈٹ اسے، دا شاہراتی ایلو ملک ءِ ہم گنڈک، اوپارے کہ سی پیک نا دیکی روٹ ءِ مہالوبایدے جوڑ کروئی ئسک انتئے کہ داڑان پدسلوک آ علاقہ غاتا شونداری ترند مننگ کریکہ، چین ہم کنیکٹیوٹی کن دیکی روٹ آ زیات چکار ہمووخت آ تسوسس ہراتم دے ٹکی روٹ، دیکی روٹ آن مون آ پیش تماسس، ننے ہم سی پیک نا دیکی روٹ ءِ ڈویلپ کننگ نا گرج ءِ داڑان فاٹا ہم کنیکٹ مریک۔ اوپارے کہ نن ڈٹ اس جوڑ کننگ اُن کوئٹہ آن تفتان ایران اسکان اس ٹریک اس جوڑ مرے، داڑکن بنجائی وزیر ریلوے شیخ رشید بی او ٹی بند او آ کاریم کننگ ءِ۔ وزیراعظم عمران خان پارے کہ کوئٹہ نا ماسٹر پلان بھاز المی ءِ ، کوئٹہ ایلو بھلا شارتیانبار تالان مرسا کننگ ءِ، بھلا شار تا ماسٹر پلان اف ہراڑا نن فیصلہ کرین کہ اسلام آباد، لاہور و پشاور نا پوسکن ءُ ماسٹر پلان اس جوڑ کننگے، ماسٹر پلان آن پد ہی آسراتی گرج انا رداٹ تننگ مریک ، شون ہلوک ملک آتے ٹی داوڑ وخت اس ہم شارک تالان مفسہ۔ اوپارے کہ دیر اسہ بھلو معاملہ اسے، دابروک آ وخت آتے ٹی پین ودسا کیک، دیر ءِ کوڑی کننگ کن ڈیم تا جوڑ کننگ، دیر انا ری سائیکلنگ ، سیوریج سسٹم نا اپ گریڈیشن نا باوراٹ پورو پلان اس جوڑ کروئی تمک۔ اوپارے کہ بلوچستان اٹی درخت خلنگ ہم بھاز المی ءِ ، اینو نن درخت خلینہ تو آخبت بروک آ چین تے اوفتا فائدہ رسینگک۔ وزیراعظم عمران خان پارے کہ بلوچستان نا خلقت اٹی سکل ڈویلپ کننگ نا گرج ءِ داڑکن بلوچستان اٹی سکل ڈویلپمنٹ کن کثیر انسٹی ٹیوٹ نا گرج ءِ ہراکہ بلوچستان نا الس نا سکل آتے گچین جوڑ کننگ کے۔ اوپارے کہ پنجاب و کے پی کے نا تہہ ٹی غٹ ہندی حکومت آتا نظام ءِ سٹڈی کرسا اسہ جامع بلدیاتی نظام اس جوڑ کننگانے ، دانظام اٹی ویلج کونسل ءِ اوار کننگانے، کے پی کے نا خلقت دُوارہ جماعت اسے حکومت کننگ کن الیپسہ ولے ننا سرسہبی نا سوب ویلج کونسل والا بلدیاتی نظام ءِ ، خلق نا گچین مروک آ بندغ آک جوان پہہ مریرہ کہ خلق انا خلقت نا انت گرج آک ءُ، داوخت آ وزیراعلیٰ بلوچستان جام کمال خان ہم دود آن تران کرے۔
