کوئٹہ۔ 29مارچ(اے پی پی) وزیراعظم عمران خان جمعہ نادے آ داڑے پاک آرمی و حکومت بلوچستان نا اواری اٹ پوسکن انگا کارڈیک سینٹر و ژوب روڈ (این 50 شاہراہ ) تون اوار میگاپروجیکٹ آتا بنداو ءِ تخا۔ وزیراعلیٰ بلوچستان جام کمال و چیف آف آرمی اسٹاف جنرل قمر جاوید باجوہ ئسک ہم وزیراعظم تون اوار ئسر۔ آئی ایس پی آر نا کنڈآن جاری بیان نا رداٹ پاک آرمی بلوچستان نا حکومت نا اواری اٹ شونہال بلوچستان پروگرام نا رداٹ کوئٹہ ٹی پوسکن انگا کارڈیک سینٹر نا جوڑ کننگ نا ڈٹ اس وضع کرینے ہرانا مسخت متحدہ عرب امارات نا سپانسر کروک یوپی اے پی ڈٹ آتارداٹ ہندی آبادی ءِ گچین طبی آسراتی فراوان کننگ نا ءِ ۔ است انا مرض انا دا ہسپتال آپریشن تھیٹر ، ایکوو نیوکلیئر کارڈیوآسراتی تتون اوار پوسکن انگا طبی آسراتی تیان آراستہ مریک۔ دا ہسپتال ءِ چاگڑد دوست کننگ کن بائیو میڈیکل ورکشاپ و ویسٹ مینجمنٹ پلان اس ہم جوڑ کننگک۔ کوئٹہ۔ ژوب روڈ(این 50 شاہراہ) کچلاک، مسلم باغ وقلعہ سیف اللہ آن مرسا کوئٹہ ءِ ژوب اتون ملفک و کوئٹہ و ڈیرہ اسماعیل خان نا نیام اٹ فاصلہ 12آن کم مرسا 4گھنٹہ سلک ہراڑان ہندی آبادی نا راجی و اقتصادی شونداری تون اوار اوار ہندی کاروباری آبادی ءِ معدنیات و کانڑ آتیان بیدس بھلا منڈی تسکان آسان رسینگ فراوان مریک، دا شاہراہ خیبر پختونخوا آن کراچی نا بندرگاہ اسکان مصنوعات آتا ترند تر نقل و حمل اٹ ہم کمکار مریک۔ ’’این 50‘‘ ہرا دیکی سیم انا متوازی بنداوی علاقائی راہداری ءِ و اوغانستان و ایران ءِ پاکستان تون ملفک دا سی پیک دیکی روٹ اتون ہم اہم رابطہ اس استوار کیک ہرا گوادر بندرگاہ اسکان کاہک۔ دود اٹی بنجائی و صوبائی وزیر آک، پارلیمان نا باسک آک ، سینئر سول و عسکری کمامدارآک ہم ساڑی ئسر۔
