لاہور۔ 29مارچ(اے پی پی) بنجائی وزیر خزانہ اسد عمر پارینے کہ ننا کوشست ءِ کہ نہہ می این ایف سی ایوارڈ نا پراسیس اینخو نا سال 31دسمبر اسکان پورو کننگے، بروک آ بنجائی و صوبائی بجٹ اٹی بنجا و صوبہ غاتا نیام اٹ خراج نا بابت رابطہ ٹی گچینی اتنگک۔ او جمعہ نادے آ سول سیکرٹریٹ لاہور اٹی نہہ می این ایف سی ایوارڈ نا چرجوئی ٹی اڈ ہلوک دیوان آن پد میڈیا تون گپ و تران کریکہ۔ بنجائی وزیر اسدعمر پارے کہ ہندا دیوان اٹی تدوک آ میٹنگ اٹی ٹہیفوک آ 6ورکنگ پڑک آتا کنڈآن کروک آ کاریم انا پیش رفت نا جاچ ءِ ہلنگا انتئے کہ تدوک آ این ایف سی نا دیوان اٹی صوبہ و بنجاءِ دا چرجوئی ٹی کوآرڈینیشن نا زمواری ءِ تننگاسس۔ اسد عمر پارے کہ داہیت ستاکڑزک کہ این ایف سی نا بابت ٹہیفوک آ 6ورکنگ پڑک آتے ٹی اسٹ نا بنجا ، پنجاب و خیبر پختونخوا ہم اسٹ اسٹ وخت اس کہ بلوچستان اِراپڑک آتا کوآرڈینیشن ءِ کننگ ءِ۔ اوپرے کہ دیوان اٹی بنجا و صوبہ غاتا سوج ، آراء و سلاہ و سفارشات آتیاسجفنگ و بروک آ لائحہ عمل ءِ پک کننگا دیوان اٹی داہیت آ امنا کننگاکہ این ایف سی ایوارڈ اٹی جم وڑاٹ گچینی اتوئی ءِ اسہ ایلو آن ہچ ءُ پلوئی اف۔ اواومیت ظاہر کرے کہ نہہ می این ایف سی ایوارڈ نا حتمی تاریخ ءِ تو تننگ مفک ولے کوشست ءِ کہ 31دسمبر اسکان این ایف سی ایوارڈ آ پراسیس ءِ پورو کننگے ، ولے اسہ اِراہندن ءُ معاملہ ءُ ہرافتیا اصولی موقف پک کننگ نا گرج ءِ، دافتیان اسٹ فاٹا نا خیبر پختونخوا ٹی اوار کننگ آن پد ہموجاگہ نا معاملہ غاتے ٹی گچینی اتنگ نا ءِ و دا مچ آ قوم انا عزم ءِ کہ فاٹا نا شونداری کاریم تیٹی ترندی اتنگے۔ اسد عمر پارے کہ تدوک آ منہ سال اٹی ہف می این ایف سی ایوارڈ آن پد بنجا و صوبہ غاتا نیام اٹ خراج نا بابت رابطہ نزور مس ولے داسہ نن خوانہ کہ بروک آ بنجائی و صوبائی بجٹ اٹی دا چرجوئی ٹی پیش رفت و گچینی اتنگک۔ باسک این ایف سی سندھ اسد سعید پارے کہ دیوان اٹی داہیت آ اصولی ءُ موقف اس اختیار کننگانے کہ صوبہ سے نا نسخان یا کس اسے زیات فائدہ مف، اواومیت ظاہر کرے کہ پین وخت اس ہم این ایف سی نا بابت دیوان ءِ آپریٹو چاگرڈ اٹی برجا سلک، باسک این ایف سی بلوچستان محفوظ علی خان پارے کہ بلوچستان اٹی دہشت گردی تون اوار سیکورٹی نا حالیت آتا سوب خڑچ آک کیہی گناودانو۔ اوپارے کہ بلوچستان ءِ ایلو صوبہ غاتا بریبر اتنگ کن ہم میکنزم اس جوڑ کننگ نا گرج ءِ ۔ خیبر پختونخوا نا وزیر خزانہ تیمور جھگڑا پارے کہ غٹ صوبہ غاتا آراء نا رداٹ این ایف سی ایوارڈ اٹی گچینی اتنگ نا کوشست کننگک۔ اوپارے کہ فاٹا نا ڈویلپمنٹ اٹی مچ آ ملک بشخ شاغک، وزیرخزانہ پنجاب ہاشم جواں بخت پارے کہ پوسکن آ این ایف سی ایوارڈ نا بابت پراسیس بے کچ گچین چاگڑد اٹ چلینگ انگ ءِ، دیوان اٹی غٹ اکائی تا کنڈآن بنجانا فائدہ ٹی سجفنگا و داہیت آ امنا کننگاکہ نہہ می این ایف سی ایوارڈ آن بنجا و اونا غٹ اکائی تے فائدہ دوئی مریک۔ اوپارے کہ پاکستان نا شونداری و شونہالی ٹی غٹ صوبہ غاتا کڑد اسہ وڑنا اہمیت تخک وخت اس کہ فیڈریشن نا سوگوی صوبہ غاتا سوگوی نا ضامن ءِ ، قومی مالیاتی کمیشن اٹی غٹ باسک آتا رائے اسہ وڑاہمیت تخک۔ اومیت ءِ کہ صوبہ غاک اسہ ایلو نا ویل آتے مون آ تخسا اسیجا فائدہ تروک سلاہ پیش کیرہ و اسہ ایلو نا آراء نا شرف ءِ کیرہ۔
