عمران خان نا وزارت عظمیٰ ءِ سنبھالنگ تون پاکستان و سعودی عرب نا تعلقداری تیٹی گرم جوشی بس
پلوامہ جلہو آن پد پاکستان و بھارت نا نیام اٹ بے چیٹی تے کم کرفنگ کن سعودی عرب کلیدی ءُ کڑد اس ادا کرے
ریاض۔ 29مارچ(اے پی پی) بنجائی وزیر اطلاعات و نشریات چوہدری فواد حسین پارینے کہ عمران خان نا وزارت عظمیٰ ءِ سنبھالنگ تون پاکستان و سعودی عرب نا تعلقداری تیٹی گرم جوشی بس، پلوامہ جلہو آن پد پاکستان و بھارت نا نیام اٹ بے چیٹی تے کم کرفنگ کن سعودی عرب کلیدی کڑد ادا کرے، سعودی وزیر خارجہ پاکستان و بھارت نا ہلہلئی دورہ ہم کرے ، پاکستان اٹی تدوک آ اسہ سال آن گچین ءُ فلم جوڑ مننگ بناکرینے ، دنیا ٹی پاکستان ڈرامہ غاتا آب گچین ءِ، سعودی عرب اٹی پاکستانی فلم تا نمائش ، ڈرامہ و فلم تا تبادلہ و سعودی ایئر لائن آن پاکستان ٹی وی پروگرام نشان تننگ نا بابت ہیت مسنے، پاکستان سعودی عرب اٹی سینما و فلم انا بشخ اٹی زرکاری کننگ کیک۔ او جمعہ نادے آ سعودی دارالحکومت ریاض اٹی میڈیا تون گپ و تران کریکہ۔ بنجائی وزیر اطلاعات و نشریات چوہدری فواد حسین سعودی عرب اٹی اِراملین پاکستانی تے سلام پیش کرسا پارے کہ سعودی عرب اٹی پاکستانی کمیونٹی تینا زرمبادلہ غاتے گدریفسا پاکستان معیشت ءِ سوگو کننگ اٹ تینا بنداوی کڑد ءِ ادا کننگ ءُ۔ اوپارے کہ سعودی عرب اٹی وزارت دودوربیدگ نا جاری کننگ نا بنائی دود اٹی بشخ ہلنگ کن سعودی وزیر دودوربیدگ نا سلہ غا سعودی عرب نا دورہ غا بسوسس، سعودی عرب نا پاکستان تون گہراتعلق ءِ۔ ہراتم آن عمران خان وزارت عظمیٰ ءِ سنبھالانے ہوتم آن ہڑتوم آ ملک آتے ٹی تعلقداری تیٹی پین گرم جوشی بسنے۔ اوپارے کہ سعودی ولی عہد ہراتم پاکستان نا دورہ ءِ کرے و پاکستان کن ہرالوز آتے او کاریم اٹ ایس اوفتا مثال ملیپک خاص کر سعودی ولی عہد نا داپاننگ ءِ کہ او سعودی عرب اٹی پاکستان نا سفیر ءِ اعزازاسے آن کم اف دراصل اونا پاکستان تون تعلق پاش مریک و داڑآن داہم پاش مریک کہ ہڑتوم آ ملک آتا سرکڑدہ غاتا اسہ ایلو ٹی تعلقداری اخس کڑمب ءِ۔ بنجائی وزیر چوہدری فواد حسین پارے کہ پلوامہ جلہو آن پد پاکستان و بھارت نا نیام اٹ بے چیٹیک بناکریر اودے کم کننگ کن سعودی عرب نا اہم ءُ کڑد اسے، سعودی عرب نا وزیر خارجہ پاکستان و بھارت نا دورہ ءِ کرے و بے چیٹی تے کم کننگ آ زور شاغا۔ اوپارے کہ سعودی عرب اٹی وزارت دودوربیدگ نا اڈتننگ جوان ءُ گام گیج اسے، سعودی عرب نا وزارت دودوربیدگ نا مون آ دننگ کن پاکستان تینا پبی کڑد ءِ ادا کیک، پاکستان نا دودوربیدگ پنچ ہزار سال متکن ءِ و ارتقائی عمل آن گدرینگانے، ننا ادارہ غاک سوگو ءُ ہنداخاطران نن سلہ خلکونن کہ سعودی عرب دودوربیدگ نا بابت اکیڈمی تے کن پاکستانی آرٹسٹ نا خذمت آتے فراوان کننگک ، سعودی وزیر دودوربیدگ دا سلہ نا ستا نا خیرمقدم ءِ کرینے۔ اوپارے کہ تدوک آ سال سعودی عرب اٹی راحت فتح علی خان بسوسس و پرفارم کرے، بروک آ تُو اپریل اٹی دُوارہ سعودی عرب اٹی پاکستانی دودوربیدگ نا میلہ اس بیرفنگک، سعودی عرب نا شاری تتون اوار داڑے ساڑی پاکستانی تے ہم ہُننگ کن بھاز ملک۔ اوپارے کہ سیل وسوات نا مون آ دننگ کن پاکستان چندی ملک آتون ویزہ رجیم اٹی بدلی کرینے ہنداوڑ سعودی عرب نا شاری تیکن ویزہ و فیس ءِ چٹفنگانے۔ سعودی شاری تے پاکستانی ایئر پورٹس آ ہی ویزہ جاری کننگک۔ اوپارے کہ حکومتی گام گیج آتیان پاکستان اٹی سیل و سوات ءِ مون آ دننگ دوئی مننگ ءِ۔ سعودی سیل و سواتی تا پاکستان آ بننگ ننا معیشت کن فائدہ مند مریک۔ بنجائی وزیر چوہدری فواد حسین پارے کہ بھلو کچ اسے ٹی سعودی شاری تا بننگ آن السی رابطہ غاتے مون آدننگ رسینگک۔ اوپارے کہ سعودی عرب تون پاکستانی ڈرامہ و فلم آتا تبادلہ ءِ کینہ۔ سعودی ایئر لائن آن پاکستانی ٹی وی پروگرام تے نشان تننگ نا ہیت مسنے ۔ اوپارے کہ سعودی عرب آن پاکستانی فلم تا نمائش نا موکل آہم ہیت مسنے۔ اوپارے کہ 1971 آن پد پاکستانی سینما زوال پذیر ئس ہراداسہ گچین مننگ ءِ، پاکستان اٹی تدوک آ اسہ سال آن گچین ءُ فلم جوڑ مننگ بناکرینے، دنیا ٹی پاکستانی ڈرامہ غاتا آب گچین ءِ ، حکومت گچین ءُ فلم جوڑ کروک آتا است بڈی ءِ کننگ ءِ۔ اوپارے کہ پاکستانی سعودی عرب اٹی سینما و فلم نا بشخ اٹی زرکاری کننگ کیرہ۔ اوپارے کہ دنیا ٹی پاکستانی دودوربیدگ نا کمک اٹ مثبت ملکی دروشم ءِ تالان کننگ کن کوشست کننگ ءِ۔
