اقوام متحدہ۔ 29مارچ(اے پی پی) پاکستان اقوام متحدہ نا انسداد دہشت گردی نا حکمت عملی ءِ سیاست اٹ اوار کننگ ءِ سخت تنقید نا نشانہ کرسا پارینے کہ دا گام گیج اقوام متحدہ نا انسداد دہشت گردی نا نظام نا سالمیت آ سمجھوتہ اس تکنگک۔ اقوام متحدہ ٹی پاکستان نا آخبتی مندوب ڈاکٹر ملیحہ لودھی اقوام متحدہ نا سلامتی کونسل آن تران اٹی پارے کہ فنانشل ایکشن ٹاسک فورس(ایف اے ٹی ایف) و دابابت پابندی نا گام گیج آتے اسہ ملک اسے ہم تینا جغرافیائی مسخت آتا دوئی کننگ کن بایدے کاریم اٹ اتنگپ و نئے ادارہ ءِ سیاسی مسخت آتے کن پلیٹ فارم اس جوڑ کننگے۔ اوپارے کہ جہانی ادارہ ءِ زیات آن زیات بااثر کننگ کن فیصلہ سازی نا عمل اٹ تینا باسک آتا کچ اٹی ودکی نا گرج ءِ۔ ڈاکٹر ملیحہ لودھی دہشت گردی نا مالی کمکاری نا توننگ و اونا چٹفنگ نا بابت شرہ غان تران کریکہ ہرا سلامتی کونسل نا 1267سینکشنز کمیٹی نا منظوری آن پد امریکہ نا کنڈآن سلامتی کونسل نا 15باسک آتے گدریفوک آ قرارداد آن پد اڈ ہلک ہراٹی جیش محمد نا سروک مسعود اظہر ءِ اقوام متحدہ نا پابندی تا بلیک لسٹ اٹی اوار کننگ نا خواست کننگاسس۔ تینا تران اٹی ملیحہ لودھی دہشت گردی و انتہاپسندی نا برخلاف موثر حکمت عملی نا رداٹ مثبت سوچ انا گرج آ زور شاغا و پارے کہ جہانی مسخت آتا دوئی کننگ کن اسیجا حکمت عملی اسے نا رداٹ گام گیج آتا گرج ءِ۔ اوجہانی برادری نا کنڈآن انسداد دہشت گردی نا ساڑی حکمت عملی ٹی گڑاس نقائص آتاہم تذکرہ ءِ کرے و پارے کہ غٹ آن اہم ٹک دادے کہ داٹی پیشن نا نیام تمنگ ، درملکی کوزہ غا چکار کننگتنے وخت اس کہ انسان نا پیدائشی حق حق خودارادیت ءِ ہم گوجالنگانے و دنیا نا چندی علاقہ غاتے ٹی خلقت درملکی تسلط نا شیف زند ءِ تیر کننگ آ بیوس ءُ ہرا اقوام متحدہ نا چارٹر و جہانی کانود آتا خلاف ورزی ءِ۔ اوپارے کہ گڑاس سوب آتا بناء غا دُن انگا ویل آتیا چکار کپننگ انگ ءِ۔ اوپارے کہ جہانی برادری داہیت آ امنا ءِ کہ انسانی حق انا پدریسہ خلا ف ورزی انتہاپسندی نا مون آ دننگ نا سوب ءِ۔ پاکستانی مندوب پارے کہ مقبوضہ کشمیر و فلسطین اٹی داسکان کشت وخون برجاءِ۔ داکان بیدس تینا روا حق خودارادیت کن پرامن جہد کروک آ کودک شاری تیا کروک آ بیدادی ریاستی دہشت گردی نا سوب مریک ہراڑا جہانی برادری نا چکار نا گرج ءِ۔ پاکستانی سفیر پارے کہ گڑاس دیکی ملک آتے ٹی اسلامو فوبیا نا رداٹ انتہاپسندی ٹی ودکی گڑتی نا سوب ءِ و داوڑنا انتہاپسندی نا برخلاف ایکشن المی ءِ انتئے کہ داڑان بیدادی ٹی ودکی مریک۔ اوپارے کہ پاکستان پیشن نا عنصر آتا مخ تفی آن کروک آ دہشت گردی آن زہمی ءِ ولے نن دا نا برخلاف برسرپیکار اُن۔ اوپارے کہ پاکستان کثیر الجہتی قومی پالیسی نا رداٹ انسداد دہشت گردی نا گام گیج کرینے و 20 ٹکی حکمت عملی نا رداٹ پاکستان دہشت گردی نا مالی کمکاری نا توننگ و چٹفنگ کن گام گیج کننگ ءِ۔ اوپارے کہ اسہ بھلو کیش بیسڈ اکانومی مننگ نا سوب آن مستین اٹی پاکستان کن ایف اے ٹی ایف نا سلاہ غاتیا عمل اٹ مشکلات ئس ولے داسہ کٹیا کپروک ادارہ غاتیا خصوصی چکار کننگ انگ ءِ تانکہ دہشت گردی ءِ ہچ وڑنا مالی کمک تننگ مف ہراٹی دزگیری و بیرہ تدوک آ اسہ سال اٹی دابابت کیس آتا رجسٹریشن و دہشت گردی نا دوبہ غا سزاتیٹی 7 گنانمان ودکی مسنے۔
