اسلام آباد۔ 28مارچ(اے پی پی) وزیراعظم عمران خان پارینے کہ غٹ اڑاند آتے مر کرسا راج انا کم کٹیا کروک آ تپہ غاتے کن بروک آ تُو پوسکن آ پاکستان ہاؤسنگ ڈٹ ءِ بناکننگک، اُراتفنگ کن پرائیویٹ سیکٹر و ورناتے وارخواہی تننگ انگ ءِ ، مالیاتی ادارہ فاٹا و قبائلی علاقہ غاتے ٹی ہم اُراجوڑکننگ کن فنانسنگ کینہ، سرسہب ’’سونامی ٹری ڈٹ‘‘ آنبار تینا اُرااسکیم اٹی ہم ہدف آتے دوئی کینہ، بنجائی دارالحکومت اٹی کثیر المنزلہ ماڑی تیکن سنگاپور و دبئی ماڈل ءِ تینا کننگک، بیرہ اسلام آ باد اٹی 500 ارب مالیت نا سرکاری ڈغار تیا کوزہ غاتے پدی ہلنگانے ، کوزہ کروک آتا برخلاف فوجداری مقدمہ غاتے درج کننگک، کچہ انگا آبادی تے ریگولائزکرسا اوفتے رہینگ انگ کن اُرا، فلیٹس و کمرشل سینٹرفراوان کینہ۔ او پنچ شنبے نادے آ داڑے پاکستان ہاؤسنگ کانفرنس آن تران کریکہ۔ ہاؤسنگ ٹاسک فورس انا چیئرمین ضیغم رضوی، ورلڈ بینک انا کنٹری ڈائریکٹر الینگوپیچ ہموتو، پنجاب نا وزیر ہاؤسنگ محمود الرشید آن بیدس چندی بینک، کنسٹریکشن کمپنی، رفاعی ادارہ غاتا نمائندہ، انجینئرنگ یونیورسٹی تا شعبہ انفراسٹرکچر ، انجینئرنگ نا بشخ انا سرکڑدہ غاک و پی ایچ ڈی نا طالب علم و درملکی ڈل آک ہم دود اٹی ساڑی ئسر۔ وزیراعظم عمران خان دود آن تران کرسا پارے کہ نن جہانی بینک انا منت واری ءِ ہرفینہ ہراپاکستان تحریک انصاف نا پوسکن آ پاکستان ہاؤسنگ اسکیم اٹی کمک کن پاکستان تون رابطہ کرینے و فنڈ تننگ نا فیصلہ ءِ کرینے۔ اوپارے کہ پاکستان اٹی 50لکھ اُراتا تفنگ اسہ بھلو ہدف اسے، اینو آن مہالو اسہ حکومت اس ہم عملی وڑاٹ داوڑنا ڈٹ بناکتنے ، داوخت آ ہم پاکستان اٹی اسہ کروڑ اُراتا کمتی ءِ ہرادے مون آ تخسا ساڑی حکومت 50 لکھ اُراتا ڈٹ ءِ پیش کرینے ہراکہ اسہ شاندار ءُ ڈٹ اسے، داٹی مشکل تو ضرور بریک ولے داغٹ مشکل آتے مر کرسا دا ڈٹ ءِ لانچ کننگک۔ اوپارے کہ اسٹیٹ بینک موٹیگج و مالی وسیلہ ودی کننگ نا بابت گام گیج چست کرینے، کم کٹیا کروک اُراتا تفنگ کن کم انگا شرح سود آآسان وام نا آسراتی آن بیدس سٹیٹ بینک دا بارواٹ کانود سازی کن ہم حکومت نا کمک ءِ کننگ ءِ۔ اواسہ مثال اس تس کہ ہراتم پاکستان تحریک انصاف نا حکومت خیبر پختونخوا ٹی اسہ ارب درخت خلنگ نا ہیت ءِ کرے تو اوڑکن اولیکو اِراسال اٹی نرسری وانفراسٹرکچر جوڑ کننگا و اوکان پد مسہ سال پدریسہ درخت خلنگا ، جہانی ادارہ غاک امنا کریر کہ کے پی کے ٹی اسہ ارب 18 کروڑ درخت خلنگانے ہرا ننا ڈٹ انا سرسہبی نا شاہدی اسے، ہنداوڑ ننا کوشست ءِ ہاؤسنگ سکیم ناجاری کننگ آن مست انفراسٹرکچر ءِ پورو کننگے و غٹ تر اڑاند و مشکل آتے مر کننگے۔ وزیراعظم عمران خان پارے کہ ننا کوشست ءِ کہ پوسکن ءُ کنسٹریکشن کمپنی جوڑ مرے و دا ہاؤسنگ اسکیم اٹی تینا پبی کڑد ءِ ادا کیر تانکہ اوفتا ملکیت ہم اوار مننگ کے، ہراتم اُراک جوڑ مریرہ تو 40 صنعت داڑان شون ہلیرہ۔ اوپارے کہ ننا مسخت ءِ کم کٹیا کروک و اڑزان اُراجوڑ کننگ کن لس بندغ ءِ آسان وڑاٹ وام تننگے، اینو آن مست لس بندغ نا وام تا تصور ہی الوکہ، بیرہ اشرافیہ تپہ ءِ وام آتون اوار غٹ آسراتی ملسا کرینے داسوب آن دا ملک تپہ اشرافیہ نا ملک اس جوڑ مسنے، داڑے تعلیم ، پرائیویٹ ہسپتال، انگلش میڈیم اسکول ، یونیورسٹیک بیرہ اشرافیہ تپہ غاتے کن ءُ و ہراتم بزغرآتے سبسڈی تننگک تو ہموڑے ہم بااثر و بھلا بزغرآک فائد ہ ہرفرہ و چنکا بزغر نا حالیت جوان مننگ کتو۔ وزیراعظم عمران خان پارے کہ کم کٹیا کروک خلقت کن اسہ پین آسراتی اس تخنگانے اخس قسط ءِ او برداشت کننگ کیرہ او ہموخس ایتر ایلو قسط ءِ سپانسرڈ کرفنگ نا کوشست کننگک۔ اوپارے کہ پاکستان ہند ن ءُ ملک اسے ہراڑے خیرات غٹ آن زیات یکجا مریک ولے خراج یکجا مننگ کپک، دانا سوب دادے کہ الس ءِ حکومت آ پت الوکہ، ہراتم الس نا حکومت آ پت مریک تو ولدا خراج ہم زیات یکجا مننگ بناکیک۔ اوپارے کہ نن لینڈ بینک اس جوڑ کننگ نا کوشست کرین، سرکاری ادارہ غاتا بے شمار ڈغار ہندن ءُ ہراہچ ءُ کاریم اسے ٹی افس و بیرہ اسلام آباد اٹی کوزہ مافیا غان 500 ارب نا ڈغار تے پدی ہلنگانے۔ تجاوزات آتا برخلاف آپریشن اٹی دالمی جوڑ کننگانے کہ غریب آتا اُراتے دڑفنگپ ۔ اوپارے کہ دا بھلو خوشی اسے نا ہیت ءِ کہ پاکستان نا پرائیویٹ سیکٹر تون اوار اوار چین ، ملائشیا نا کنسٹریکشن کمپنیک و اوورسیز پاکستانیز ہم پوسکن آ پاکستان ہاؤسنگ اسکیم نا رداٹ اُراجوڑ کننگ اٹ است خواہی ہلنگ ءُ۔ اوپوسکن آ پاکستان ہاؤسنگ ٹاسک فورس انا چیئرمین ضیغم رضوی ءِ خراج تحسین پیش کرسا پارے کہ ضیغم رضوی رضاکارانہ وڑاٹ داخذمت ءِ سرانجام تننگ ءِ۔ داکان مست ہاؤسنگ ٹاسک فورس انا چیئرمین ضیغم رضوی پوسکن آپاکستان ہاؤسنگ اسکیم نا بابت وخت اس کہ ورلڈ بینک انا کنٹری ڈائریکٹر الینگوپیچ ہموتو پوسکن آپاکستان ہاؤسنگ ڈٹ اٹی کمک نا بابت بشخ ہلوک آتے معلومدار کرے۔ داوخت آ پاکستان و جہانی بینک انا نیام اٹ ہنکینی بشخ اٹی کمکاری کن مفاہمتی یات داشت اسے آ دستخط ہم کننگا۔
