کوئٹہ۔ 28 مارچ (اے پی پی) ڈائریکٹر جنرل نیب بلوچستان محمد عابد جاوید پارینے کہ قومی احتساب بیورو کانود نا حکمرانی ، میرٹ و شفافیت نا اصول آتیا باور کیک، کیہی محکمہ غاتے ٹی میرٹ ءِ لتاڑسا اہل بندغ آتا مقابلہ ٹی نابود بندغ آتے برخلاف کانود شرف تننگ نا غاوک لمحہ فکریہ ءُ، بلوچستان اٹی میرٹ آ سنجھوتہ ناقابل قبول ءِ، قومی فائدہ غاتا ڈٹ آتے ٹی وڈی خوری کروک آتے اسُل بشخنگپک، الس نا غاو تیا قومی وسیلہ و خزانہ ءِ پلوک آتے اوفتے اوفتا کروک نا سزاتننگ کن غٹ وسیلہ غاتے کاریم اٹ اتنگک، داخیال آتا درشانی ءِ او پنچ شنبے نادے آ نیب بلوچستان اٹی کھلی کچہری نا وخت آ غاو تروک آتون گپ و تران کرسا کرے۔ سہب انا 10 بجہ غا بناکروک آ کھلی کچہری ٹی کوئٹہ، مستونگ تون اوار بلوچستان نا کیہی علاقہ غاتیان خلقت نا اسہ بھلو کچ اس میرٹ نا برخلاف گام گیج و ملکی خزانہ ءِ نسخان تروک آ عنصر آتا پیدواری کن ڈی جی نیب انا مون آ پیش مسر، ڈی جی نیب بلوچستان میرٹ نا برخلاف بھرتی، اہل بندغ آتا جاگہ غا نابود آفیسر آتے کلیدی عہدہ تننگ و مفاد عامہ نا ڈٹ آتے ٹی وڈی خوری نا غاوتیا پیدوار کرے کہ قومی احتساب بیورو میرٹ نا لتاڑ و وڈی خوری نا مرتکب زموار آتے اوفتے اوفتا کروک نا سزا تننگ کن ہر حد اسکان کانہ۔ اوپارے کہ قومی احتساب بیورو ملک آن وڈی خوری نا چٹفنگ کن سنجیدہ کوشست کننگ ءِ انتئے کہ وڈی خوری نا پورو توننگ آن ہی وطن عزیز ءِ شونداری و شونہالی نا کسر آ روان کننگ مریک، اوپارے کہ وڈی خوری ملکی شونداری و شونہالی نا کسر اٹی غٹ آن بھلا اڑاند ءِ ، داکان مست ڈی جی نیب بلوچستان محمد عابد جاوید مفاد عامہ نا ڈٹ آتے ٹی وڈی خوری و میرٹ نا برخلاف گام گیج آتا بابت غاوتیا دمدستی کارروائی نا پرمان کرسا تعلقدار ونگ ءِ اودے رپورٹ کننگ نا پارت تس۔
