ہری پور۔ 28مارچ(اے پی پی) وزیر مملکت پارلیمانی امور علی محمد خان پارینے کہ السی غاوتیا دمدستی کارروائی تعلقدار آفیسر آتا زمواری ءِ، تحریک انصاف ہم ہندا منشور ءِ اتسا بسنے کہ السی غاوتا ازالہ ءِ کینہ، السی غاوتا ازالہ مریک تو شونداری و شونہالی مننگ کیک، حکومت بنجائی و صوبائی کہول آ غاوتا سیل اس جوڑ کننگ ءِ ہندا مسخت کن عمل اٹ ایسونے۔ او تدوک آ دے ہری پور نا اسہ دے ئی دورہ سے نا وخت آ میڈیا تون گپ و تران کریکہ۔ داوخت آ ڈی پی او ہری پور ، ڈپٹی کمشنر ہری پور، اسسٹنٹ کمشنر ہری پور و سرکاری محکمہ غاتاآفیسر آک ہم ساڑی ئسر ۔ اومستی پارے کہ ننے لس بندغ آتاادارہ غاتیا پت ءِ بحال کروئی ءِ و نن داٹی سرسہب مننگ اُن، آفیسر آک تینا زمواری تے پورو کیرہ تو ادارہ غاتا کارکڑدگی السی اومیت آتا رداٹ مریک، انتظامی کہول آ یا پین ادارہ سے ٹی السی غاو او ادارہ غاتے زوال نا دلدل اٹ بٹک، ننے گمر ءِ کہ الس ننا غاو سیل آپت اتون رابطہ کیرہ، او بنجائی حکومت نا نمائندہ نا حیثیت اٹ دا پاننگ کن بسونے کہ غاوتیان پد غاو اسے نا مننگ ہمو ادارہ نا بے سہبی تکنگک۔ اوڈپٹی کمشنر و ڈی پی او آفس تون اوار غٹ ہندی ادارہ غاتا ریکارڈ نا جاچ ءِ ہلک و اوفتیا است جمی نا درشانی ءِ کرسا پارے کہ ادارہ غاک جوانی نا کنڈاہِننگ ءُ، زوت نن تینا مسخت آتے ٹی سرسہب مرینہ ہرانا وعدہ ءِ نن گچین کاری مہم نا وخت آ کرین و ہرافتا اومیت ءِ ننے آن الس کننگ ءِ۔ داوخت آ بنجائی وزیر پارلیمانی امور علی محمد خان یونیورسٹی آف ہری پور اٹی مسہ دے ئی انٹرنیشنل کانفرنس اٹی ہم شرکت کرے وپارے کہ السی ویل آتے ایسر و چٹفنگ کن ہردے نا بنداو آ جتا ہند آتیا محکمہ غاتا سرکڑدہ غاتون اواری اٹ گام گیج کننگ انگ ءِ تانکہ خلقت ءِ مون تروک ویل آتا چٹفنگ مننگ کے۔
