اسلام آباد ۔ 28 مارچ(اے پی پی) بنجائی وزیر پٹرولیم غلام سرور خان پارینے کہ تیل و گیس انا بشخ اتون گنڈوک کمپنیک علاقائی شونداری و الس نا راجی آسراتی نا بابت تینا راجی زمواری تے پورو کیر۔ اوداخیال آتا درشانی ءِ پنچ شنبے نادے آ وزارت پٹرولیم اٹی کمپنی تا راجی زمواری تا بابت بٹنگوک آ اسہ دیوان اسے نا کماشی ءِ کرسا پارے۔ اوپارے کہ تیل و گیس انا بشخ اتون گنڈوک کمپنیک ہنگو و کوہاٹ تون اوار ایلو علاقہ غاتے ٹی ہندی غیر ماہر افرادی واک آتے روزگار فراوان کیر۔ اوپارے کہ کمپنیک ہمو روڈ آتا جوڑ جاڑ نا بست وبند ءِ اولیتی بنداو تیا کیر ہرا اوفتا آپریشن نا سوب آن زہمی مسنو۔ دیوان اٹی 37کلومیٹر مریس روڈ انا جوڑ کننگ، ہنگوٹی واٹر سٹوریج ، سمال ڈیم انا تفنگ کون آڈٹ آتے کن المی فنڈ آتا فراوانی نا بابت کمپنی تے تینا زمواری تے پورو کننگ نا پارت کننگا۔ بنجائی وزیر پٹرولیم تیل و گیس انا بشخ اتون گنڈوک کمپنی تا کمامدارآتے پارت کرے کہ او روڈ آتا جوڑ کننگ، ہسپتال تا جوڑ کننگ، تعلیمی ادارہ غاتا جوڑ کننگ کون آ ڈٹ آتیا چکار کیر۔ بنجائی وزیر پٹرولیم داوخت آ کمپنی تے ملوک آ است اٹ راجی آسراتی نا ڈٹ آتے ٹی تینا بشخ انا کڑد ءِ ادا کننگ نا پارت کرے۔ دیوان اٹی اوجی ڈی سی ایل ، مول و ایم پی سی ایل نا کمامدارآک اوار ئسر۔
