کوئٹہ۔ 27 مارچ(اے پی پی) میڈیکل سپرنٹنڈنٹ سول سنڈیمن ہسپتال کوئٹہ ڈاکٹر سلیم ابڑو پارینے کہ وزیراعلیٰ بلوچستان جام کمال خان نا پارت آ سول سنڈیمن ہسپتال کوئٹہ ءِ آغاخان ہسپتال نا وڑاٹ ڈیجیٹلائزڈ کننگ نا ڈٹ اس جوڑ کننگانے، داخیال آتا درشانی ءِ او میڈیا تون گپ وتران کرسا کرے، ایم ایس سول ہسپتال پارے کہ شعبہ میڈیکل ءِ ڈیجیٹلائز کرسا ڈٹ آ عمل نا بناءِ کننگانے، ڈیجیٹلائزڈ سسٹم آن پد کاغدی فائل سسٹم چٹک، مریض نا غٹ ڈیٹا، ہسٹری، اسٹیٹس و غٹ بشخ آتے ڈیٹابینک اتون گنڈنگک، اوپارے کہ مرحلہ وار غٹ بشخ آتا سنٹرلائزیشن نا سوب مریض آتے طبی خذمت آتا فراوانی ٹی آسانی وخت اس کہ چندی بشخ آتا طبی چاہندار آتے مریض نا ہسٹری اسکان دمدستی رسینگ مریک، سول سنڈیمن ہسپتال کوئٹہ بلوچستان نا اولیکو سرکاری ہسپتال ءِ ہرا آغاخان ہسپتال نا وڑآ ڈیجیٹلائز کننگ انگ ءِ اوپارے کہ وزیراعلیٰ بلوچستان جام کمال خان و وزیر جان جوڑی میر نصیب اللہ مری نا ویژن نا رداٹ سول ہسپتال کوئٹہ ءِ ملک انا بھلا ہسپتال آتا وڑاٹ رول ماڈل اس کینہ، اومستی پارے کہ مستین و اینو نا سول ہسپتال نا موازنہ ءِ کرسا صوبائی حکومت نا اولیت آتا جاچ ءِ ہلنگ مریک سول ہسپتال کوئٹہ غان اسہ مریض اس ہم بیدس ریلیف آن پدی ہنپک پین گچین جوڑ کینہ۔
