فوجی عدالت آتا مد اٹی توسیع نا بابت سلابت برجاءِ ، ہژدہ می ترمیم اٹی بدلی نا ہچ ءُ سلاہ سے آ سجفپننگ انگ ءِ
اسلام آباد۔ 27مارچ(اے پی پی) بنجائی وزیر کانود و انصاف بیرسٹر فروغ نسیم پارینے کہ فوجی عدالت آتا مداٹی توسیع نا بابت سلابت برجاءِ، ہژدہ می ترمیم اٹی بدلی نا بابت داسکان ہچ ءُ سلاہ سے آ سجفپننگ انگ ءِ، نیب کانود اٹی اصلاحات آ کاریم برجاءِ، آصف زرداری تون اوار اسہ مقدمہ سے ٹی ہم حکومت نیام تمیتنے۔ داخیال آتا درشانی ءِ او چارشنبے نادے آ انٹرنیشنل اسلامک یونیورسٹی ٹی پاکستان اٹی کانودی تعلیم نا وارخواہی و چیلنج آتا سرحال آن اِرادے ئی جہانی کانفرنس نا بنائی دود آن تران آ ن پد میڈیا تون گپ و تران کرسا کرے۔ اوپارے کہ فوجی عدالت آتا مد جنوری ٹی چٹاسس۔ وزیر خارجہ شاہ محمود قریشی دا بابت سیاسی جماعت آتون سلابت کننگ ءِ، سیاسی جماعت آک دا معاملہ غا ملاجلا ردعمل اس ظاہر کرینو اوپارے کہ ہژدہ می ترمیم نا بابت بنجائی کابینہ نا دیوان اٹی ہچ ءُ ہیت اس متنے و نئے وزیراعظم عمران خان داڑانظرنانی نا ہیت ءِ کرینے، 1973ء نا آئین ءِ ذوالفقار علی بھٹو جوڑ کرے ولے ہژدہ می ترمیم آن ثابت مریک کہ کانود اٹی المی بدلی کننگ مریک۔ ہژدہ می ترمیم نا گڑاس بشخ آتیا شرہ نا گرج ءِ ولے داسکان داترمیم اٹی بدلی نا بابت ہچ ءُ سلاہ سے آ سجفپننگ انگ ءِ۔ اوپارے کہ نیب کانود اٹی اصلاحات آ کاریم برجاءِ دااصلاحات نا رداٹ ضمانت نا اختیار ٹرائل کورٹ اتون مریک وخت اس کہ پلی بارگین و رضاکارانہ وڑوڈول اٹ بدلی تون اوار پین ترمیم کننگک۔ اوپارے کہ سپریم کورٹ نا پرمان تیا من وعن بایدے عمل مرے۔ اوپارے کہ حکومت نیب انا کاریم اٹ ہچ نیام تمپننگ ءِ آصف زرداری تون اوار اسہ مقدمہ سے ٹی ہم حکومت نا ہچ ءُ کڑد اس اف ولے وڈی خوری نا برخلاف ہروڑاٹ گام گیج کننگک۔ داکان مست پاکستان اٹی کانودی تعلیم نا وارخواہی و چیلنج آتا سرحال آن اِرادے ئی جہانی کانفرنس نا بنائی دود آن تران کرسا بنجائی وزیر کانود و انصاف بیرسٹر فروغ نسیم پارے کہ غٹ آن مقدس کانود اللہ و قرآن نا ءِ، ننکن اللہ نا کانود بنداوی کانود نا حیثیت تخک، قرآن پاک نا اولیکو وحی ’’اقراء‘‘ آن تعلیم نا اہمیت نا معلوم مریک، کانود نا تعلیم کن زبان آ عبور مننگ اہمیت تخک۔ اوپارے کہ سپریم کورٹ نا فیصلہ ساڑی ءِ کہ اردو سرکاری زبان مریک۔ اوپارے کہ کانود اٹی ہراوخت اسکان جدت ءِ کاریم اٹ اتپننگک نن پدی سلنہ، کانود نا تعلیم ءِ پوسکن آ وڑوڈول آتیا اتنگ نا گرج ءِ، کانود زند انا ہر بشخ آ اثر انداز مریک۔ ننا چکار نا مرکز کانود و راج انا و کانود و انسانی حق انا بایدے تعلق مرے، اوپارے کہ جہانی اسلامی یونیورسٹی نا شعبہ کانود نا طالب علم آک ہچ کس آن کم افس۔ ریکٹر انٹرنیشنل اسلامک یونیورسٹی ڈداکٹر معصوم یاسین زئی و چیئرمین لاء ڈیپارٹمنٹ ڈاکٹر حافظ حفیظ الرحمان ئسک ہم دود آن تران کریر۔
