اسلام آباد۔ 27مارچ(اے پی پی) بنجائی وزیر اطلاعات و نشریات چوہدری فواد حسین پارینے کہ پاکستان کن پلوامہ ہمو اولیکو ٹیسٹ کیس ئس ہراٹی بھارت ءِ ’’آؤٹ کلاس‘‘ کننگا، حکومت و پاک فوج انا کوشست آتا سوب اولیکو وار بھارت ءِ جہانی رائے عامہ ٹی تنیا مروئی تما، وزیراعظم عمران خان اولیکو دے آن امن و گپ و تران آ زور شاغسا کرے، مچ آ دنیا داامنا کرے کہ پاکستان نا بیانیہ درست و بھارت نا بیانیہ غلط ءِ ، مہالو نا دور تے ٹی وزارت اطلاعات و نشریات حکمران جماعت نا ترجمان ئس ، اولیکو وار وزارت اطلاعات و نشریات ءِ ’’سٹیٹ ٹول‘‘ اس کننگ نا ایجنڈا غا عمل کننگ ءِ، پاکستان ءِ ’’سیکورٹی سٹیٹ‘‘ نا جاگہ غا دنیا کن ’’اوپن سٹیٹ ‘‘ اس جوڑ کرینن، ویزہ رجیم پورو وڑاٹ بدل، درملکی سیل و سواتی تیکن این او سی نا شڑت ءِ چٹفنگانے، اینخو نا سال ریاستی میڈیا ٹی اصلاحات نا عمل ءِ پورو کننگک، ہائبرڈ وار فیئر پوسکن آ دور انا پروپیگنڈا نا پن ءِ، جہانی میڈیا ءِ اسلام آباد آ پدی اتنگ کن گام گیج چست کننگ اُن، درملکی میڈیا ءِ پورو آسراتی تننگک۔ او چارشنبے نادے آ اسلام آباد پالیسی ریسرچ انسٹی ٹیوٹ (آئی پی آر آئی) نا کنڈآن ’’ہائبرڈ وار فیئر اینڈ پاکستانی ریڈی نیس‘‘ نا سرحال آ اسہ دے ئی میڈیا ورکشاپ آن تران کریکہ۔ دود آن تران کرسا بنجائی وزیر اطلاعات و نشریات چوہدری فواد حسین پارے کہ مچ آ دنیا نا میڈیا ٹی پوسکن انگا ٹیکنالوجی نا کاریم اٹ اتنگ ودنگ ءِ، میڈیا ٹیکنالوجی ٹی ہائبر ڈ وار فیئر جدید پروپیگنڈا نا پن ءِ، پوسکن آ دور انا جنگ آتے ہم میڈیا نا کمک اٹ کننگ انگ ءِ۔ اوپارے کہ دنیا ٹی داوخت آ ہائبرڈ وار فیئر نا اِراجزو آئیڈیاز و پریزنٹیشن ءُ، آئیڈیاغاک جوان مفس ولے پریزنٹیشن آک جوان مریر تو ہدف آتے دوئی کننگ مریک۔ اوپارے کہ پاکستان تدوک آ کیہی سال آن دہشت گردی نا برخلاف جنگ کننگ ءِ ولے جیہانی کہول آ ہچ ءُ دُن ءُ کتاب اس شینک متنے ہراننا بیانیہ ءِ پیش کے۔ اوپارے کہ ساڑی دور اٹی ایلو قوم تیا تینا نظریہ غاتے مسلط کننگ نا رجحان ءِ ، تینا بیانیہ غاتے ایلوتسکان سرکننگ کن میڈیا نا سیبو ءِ ہلنگک۔ چوہدری فواد حسین پارے کہ پاکستان ءِ جہانی میڈیا کن تینا درگہ غاتے ملنگ نا گرج ءِ، خوانہ کہ جہانی میڈیا پاکستان آ برے و اصل عکس آتے دنیا نا مون آ پیش کے۔ اوپارے کہ ساڑی حکومت جہانی میڈیا ءِ پاکستان آ اتنگ کن گام گیج چست کننگ نا بناءِ کرینے ہرانا سوب آن اسلام آباد اٹی جہانی میڈیا نا دفترآتا جوڑ کننگ بناکرینے، بروک آ دے تیٹی ایلو جہانی میڈیا ہم اسلام آباد نا رخ ءِ کیرہ، اسلام آباد اسہ زیبدار و پرکشش ءُ جاگہ اسے ، داڑے جہانی میڈیا تولسا پاکستان نا عکس ءِ گچین وڑاٹ دنیا نا مون آ تخنگ کیک۔ اوپارے کہ مسکوہی دور تیٹی جہانی میڈیا ءِ اسہ سائیڈ آ کننگا اوکان پد جہانی میڈیا دہلی نا پلو ءِ ہلک، جہانی میڈیا دہلی ٹی تولسا تولسا ہمہ پاکستان نا اصل عکس ءِ دنیا نا مون آ تخنگ کیک۔ اوپارے کہ تدوک آ دور اٹی حکومت نا ہچ ءُ بیانیہ اس ہلوکہ ، مستین اٹی پاکستان دہشت گردی نا برخلاف تینا بیانیہ ءِ جوان وڑاٹ پیش کننگ کتو ہندا سوب آن بھارت کشمیری تا جہد آجوئی ءِ دہشت گردی گوندنگ نا کوشست کرے ولے ساڑی حکومت نا گچین پالیسی تیان بھارت ءِ پلوامہ واقعہ غا جہانی تنیائی تون مون تروئی تما۔ اوپارے کہ نن ثابت کرین کہ پلوامہ واقعہ ءِ مودی گچین کاری سرسہبی کن کاریم اٹ ایس، ساڑی حالیت آتے ٹی نن جہانی میڈیا ءِ کاریم اٹ اتسا سرسہبی دوئی کرین۔ اوپارے کہ تحریک انصاف تینا کلہو ءِ سرکننگ کن سوشل میڈیا ءِ کاریم اٹ ایس، پی ٹی آئی نا گچین وڑاٹ تینا کلہو ءِ سرکننگ سوگو نظریہ نا سوب آن ممکن مس۔ بنجائی وعزیر پارے کہ داوخت آ اے پی پی ءِ 85کروڑ، پی ٹی وی ءِ 13ارب و ریڈیو پاکستان ءِ 6ارب روپئی سالانہ بجٹ تننگ اُن ،اولیکو وار ریاستی میڈیا غا سنسر شپ ءِ چٹفنگا و اپوزیشن ءِ ہم بریبر وخت تننگ انگ ءِ ، ننا کوشست ءِ کہ اینخو نا سال اٹی ریاستی میڈیا ٹی اصلاحات پورو کرسا ریاستی میڈیا ءِ پوسکن ءُ میڈیا اس جوڑ کننگے۔ اوپارے کہ ننا نظریہ سوگو ءِ ہرانا سوب آن پدریسہ سرسہبی دوئی کننگ اُن ، تینا بیانیہ ءِ گچین وڑاٹ پیش کننگ کن میڈیا اصلاحات المی ءِ، اوکان پد قومی خبررساں ادارہ’’اے پی پی‘‘ تون گپ و تران کرسا بنجائی وزیر اطلاعات ونشریات چوہدری فواد حسین پارے کہ پی ٹی وی نا ایم ڈی نا معاملہ غاکابینہ نوٹس ہلکونے، بروک آ ہفتہ آخبتی ءُ ایم ڈی اس خلنگک۔
