اسلام آباد۔ 27مارچ(اے پی پی) پاکستان اٹی بیلا روس نا سفیر آندری ایرمولووچ پارینے کہ پاکستان نا حکومت بیلاروس تون ہڑتوم آ کنڈآتا واپاری تعلقداری تیا خصوصی چکار کننگ ءِ ، کشت وکشار ، سائنس و فارما سیوٹیکل تون اوار چندی بشخ آتے ٹی کاریم مننگ ءِ ، دنیا نا غٹ آن پنی آ کمپنی بیلاز پاکستان اٹی کانڑ کنی نا بشخ اٹی کاریم اٹ اتوک آ ہیوی مشینری لانچ کرینے۔ داخیال آتا درشانی ءِ او چراٹ سیمنٹ فیکٹری ٹی بیلاز نا کنڈآن ہیوی مشینری نا لانچنگ دود آن تران کرسا کرے۔ اوپارے کہ بیلاروس نا صدر وزیراعظم عمران خان ءِ تینا ملک انا دورہ نا سلہ خلکونے و اومیت ءِ کہ داسال انا ایسر اسکان او بیلاروس آ کاہک ہراڑان ہڑتوم آ کنڈآتا تعلقداریک پین سوگو مریرہ۔ اوپارے کہ پاکستان اٹی بیلاروس نا ٹریکٹر بھاز پنی ءِ ، ہڑتوم آ ملک آتا نیام اٹ کشت وکشار تون اوار ایلو بشخ آتے ٹی واپار نا بھلو وارخواہی اس ارے۔ اوپارے کہ بیلا روس نا بیلاز کمپنی نا ڈمپ ٹرک پاکستان نا سیمنٹ و مائننگ نا صنعت نا شونداری ٹی اہم ءُ کڑد اس ادا کیک، دا ٹرک 45ٹن سامان لوڈ کننگ نا لائخی تخک و داداڑے مہالو آن ساڑی ڈمپ ٹرک آتے ٹی غٹ آن بھلن ءِ۔ داوخت آ غلام فاروق گروپ نا ڈائریکٹر شہریار فاروق ، گریو پاکستان نا سی ای او عامر رضا و بیلاز نا ڈپٹی ڈائریکٹر مینجمنٹ ویسلی شوستاک ئسک ہم ساڑی ئسر۔ داوخت آ گریو پاکستان نا سی ای او عامر رضا پارے کہ پاکستان اٹی بیلاز کمپنی نا ہیوی مشینری ءِ گریوز کمپنی لانچ کننگ ءِ ، داڑان ملک اٹی مائننگ نا بشخ اٹی جدت بریک و پوسکن آ ٹیکنالوجی آن لیس دا مشینری مچ آ ملک اٹی مائننگ نا بشخ اٹی ایلو کمپنی تے ہم فراوان کننگک۔
