پاکستان اٹی تیل انا بھلو کوڑی اس خننگ انگ نا گمان ءِ، دانئے بیرہ پاکستان بلکن مچ آ سویلی ایشیا و خلیجی ملک آتے کن ہم جوان ءُ خبر اس مریک
چین نا پنی آ جریدہ گلوبل ٹائمز نا رپورٹ
بیجنگ۔ 27مارچ(اے پی پی) چین نا پنی آ جریدہ گلوبل ٹائمز پارینے کہ پاکستان اٹی تیل انا بھلو کوڑی اس زوت خننگ انگ نا گمان ءِ و دا نئے بیرہ پاکستان بلکن مچ آ سویلی ایشیا و خلیجی ملک آتے کن ہم جوان ءُ خبر اس مریک ۔ جریدہ ٹی شینک مروک آ رپورٹ نا رداٹ سمندر اٹی تیل انا بھلو کوڑی اس خننگ انگ نا پیدوار گمان ارے و اگہ دا چرجوئی ٹی اندازہ درست ثابت مس تو دا دریافت پاکستان ءِ اقتصادی ویل آتون مون تننگ اٹ کمک رسینگک۔ امریکی کمپنی ایگزم موبل و اٹلی نا کمپنی ای این آئی تون اوار جوائنٹ ونچر جنوری آن سمندر اٹی ڈرلنگ کننگ ءُ، اگہ تیل انا دا بھلا کوڑی خننگک تو داڑان پاکستان اٹی درملکی زرکاری ودنگ کیک، کیہی جہانی کمپنیک تیل و گیس انا پٹنگ ، تیل ساف کننگ و تیل انا ترسیل کون آڈٹ آتے ٹی زرکاری کننگ خوارہ و دازرکاری آن پاکستان ءِ تینا شونداری نا مسخت دوئی کننگ اٹ کمک رسینگک۔ چین پاکستان تون توانائی نا بشخ اٹی پبی کمک کننگ ءِ و تیل انا کوڑی خننگ انگ آن پاکستان اٹی زرکاری کن چینی کمپنی تا است خواہی پین ودک۔ چین پاکستان اقتصادی راہداری نا رداٹ سنکیانگ، اوغر وتواجہ علاقہ و گوادر پورٹ انا نیام اٹ تیل و گیس انا پیپ لین نا اسٹریٹجک ڈٹ ہم اوار ءُ، پاکستان اٹی داخہ بھلو کچ اسے آ تیل خننگ انگ آن پد ہمسایہ ملک آتے کن ہم پاکستان پیپ لین نیٹ ورک ودفنگ اٹ کمک رسینگک و پاکستان سعودی عرب کون آ خلیجی ملک آتون توانائی نا بشخ اٹی کمکاری ءِ مون آ دیک۔ تیل اناکوڑی تا خننگ انگ آن بنداوی پنجر نا بشخ اٹی زرکاری پیشن نا ملک آن زرکاری، توانائی نا واپار و الس نا کہول آ رابطہ غاک مون آ دننگرہ و ڈیہہ تیل انا کوڑی تا شونداری و کاریم اٹ اتنگ اقتصادی رابطہ و سوگوی نا تمبہ نا وڑاٹ کاریم اٹ اتیک و پاکستان اٹی تیل انا گمانی کوڑی ڈیہہ ٹی گیم چینجر اس مننگ جوڑ مننگ کیک۔
