اسلام آباد۔ 27مارچ(اے پی پی) دفترخارجہ پیدوار کرینے کہ وزیراعظم عمران خان نا اوغانستان اٹی عبوری حکومت نا بارواٹ بیان ءِ میڈیا ٹی راستکی آن چپ رپورٹ کننگا ہرا چندی حلقہ غاتیان بے سوب ردعمل نا سوب مس۔ چارشنبے نادے آ دفترخارجہ نا کنڈآن جاری وضاحتی بیان اٹی پاننگاکہ وزیراعظم تینا تران اٹی پاکستان نا ماڈل نا حوالہ ءِ تسوسس ہراڑے اسہ عبوری حکومت اسے نا رداٹ گچین کاریک اڈ تننگرہ۔ اودے اوغانستان نا داخلی معاملہ غاتے ٹی نیام تمنگ تون غلط وڑاٹ بایدے تعبیر کننگپ۔ دا بیان اوغانستان نا بارواٹ امریکی خصوصی نمائندہ زلمے خلیل زاد نا ٹویٹ نا ورندی ٹی مون آ بس ہراپاریسس کہ اوغانستان نا آخبت نا فیصلہ ءِ اوغان الس ءِ تینٹ کروئی ءِ و جہانی برادری نا کڑد دامسخت کن اوفتے یکجا مننگ نا است بڈی ءِ کننگ ناءِ۔ دفترخارجہ دوٹوک وڑاٹ پارے کہ اوغان الس و اوغان سرکڑدہ ہی ٹی سیاسی عمل نا کمک اٹ امن ءِ مون آ دننگ آن بیدس پاکستان نا اوغانستان اٹی پین ہچ ءُ فائدہ اس اف۔ داڑے دا ہیت ذکر انا قابل ءِ کہ وزیراعظم عمران خان جاری سیاسی مفاہمتی عمل اٹی جندی است خواہی ظاہر کرے و داہیت آ زور شاغا کہ پاکستان نا مخلصانہ کوشست آتے مجروح کننگ و جاری عمل نا اہم مرحلہ غا غلط فہمی ودی کننگ کن دانا غلط بایدے تعبیر ءِ کننگپ۔ بیان اٹی پاننگاکہ وزیراعظم اوغانستان نا الس نا ویل آتے پہہ مریک ہرافتے چار دہائی نا بیداد وجنگ آن پد امن تون رہینگ انگ نا حق دوئی ءِ۔
