سرکاری و نجی بشخ انا کمک اٹ ملک اٹی شجر کاری ءِ مون آ دننگ اٹ کمک رسینگک
اسلام آباد۔ 27مارچ(اے پی پی) چیئرمین سینیٹ محمد صادق سنجرانی پارینے کہ درخت نئے بیرہ چاگڑد ءِ زیبدار کیک بلکن جان جوڑی آ مثبت زہم مرتب کیک۔ ایوان بالا سرسوز و شاداب پاکستان کن سرگرم ءِ۔ موسمیاتی بدلی کاکس و سینیٹ نا قائمہ کمیٹی موسمیاتی بدلی دابابت تعلقدار بشخ آتا سلابت اٹ چاگڑد نا رکھ اکن قابل عمل سلاہ مرتب کننگ ءِ۔ ملک انا ہمو علاقہ غاتے ٹی زیات آن زیات درخت خلنگ نا گرج ءِ ہراڑے جنگل آک کم ءُ۔ اوداخیال آتا درشانی ءِ ہاشو گروپ نا کنڈآن شجر کاری مہم نا اسلام آباد اٹی بناءِ کرسا کرے۔ چیئرمین سینیٹ پارے کہ سرکاری و نجی بشخ انا کمک اٹ ملک اٹی شجر کاری نا مون آ دننگ اٹ کمک رسینگک۔ اوپارے کہ صوبائی اکائی تا نیام اٹ گچین ہم گرنچی آن چاگڑد نا رکھ اکن گام گیج آتے پین مربوط جوڑ کننگ مریک۔ چیئرمین سینیٹ پارے کہ ایوان بالا چاگڑد نا رکھ انا بابت معاملہ غاتیا کانودسازی ٹی مدام فعال کڑد ادا کرینے۔ اونجی بشخ آ زور شاغا کہ او ملک انا مر مر انگا علاقہ غاتے ٹی شجر کاری کن پبی کمک کیر۔ اوپارے کہ ایشیائی پارلیمانی اسمبلی نا دیوان اٹی سرسوز گوادر ڈٹ انا بناءِ کننگا۔ اوپارے کہ گوادر پاکستان نا آخبت ءِ، دادے پین زیبدار و سرسوز کننگ آ چکار کننگ نا گرج ءِ۔ چیئرمین سینیٹ نجی بشخ آ زور شاغاکہ او تینا راجی زمواری تا بابت حکمت عملی ٹی راج و چاگڑد کن خصوصی گا م گیج کے۔ اوپارے کہ چاگڑدی بدلی نا سوب شون ہلوک دنیا ءِ زیات گڑتیک مون تروک ءُ و دافتا مقابلہ ءِ کننگ کن مربوط وڑاٹ کوشست کننگ نا گرج ءِ۔
