اسلام آباد ۔ 26 مارچ (اے پی پی) بنجاہی وزیر پاورڈویژن عمر ایوب خان ءَ توان ءِ تک ءِ تہ گہترکاری ،لائن لاسز ءِ تہ کمی،توان ءِ دُزانی ھلاپ ءَ ابید پرک ءِ کارروائی ،ٹرانسمیشن لینانی ءِ نظام ءِ گہتری ءُُ بلانی وصولی ءِ جنز ترند کنگ ءِ جزم ءِ درشان کنان ءَ گوشت کہ گوزوکیں سال 31دسمبر ءِ تاں گردشی وام 603ارب واماں چہ 225ارب ءِ تاں آرگ بیت، فیسکو، میپکو، کیسکو ءُُ لیسکو ءَ را کارکردگی گہتر کنگ ءِ ھاترا گیش بھر کنگ بیت،گرماگ ءِ موسمءِ تہ گیش تاوان دیوکیں فیڈرانی سرا لوڈ منیجمنٹ بیت،ملک ءِ دگہ دمگانی تہ لوڈشیڈنگ ءِ وھد ءُُ پاس کم چہ کم بہ بیت،میاں اوستمانی بنک ءِ کمک ءَ گوں ٹرانسفارمر ءِ سرا میٹر جنئگ ءِ پیسلہ کنگ بوتگ، بلوچستان ءِ ٹیوب ویلز ءَ را شمسی توانائی ءِ سرا بدل کنگ بیت،آجوءِ کشمیر ءَ را یک کلدار 10پیسہ ہمک یونٹ واٹر یوزرچارجز مل انت۔اے ھیالانی درشان آہاں دوشمبے ءَ ادا اھوالکاراں گوں تران کنان ءَ کتگ ات۔اے درگت ءَ چیئرمین انرجی ٹاسک فورس ندیم بابر ءُُ بنجاہی سیکرٹری پاور ڈویژن عرفان علی ھم ساڑی اتنت۔ عمر ایوب خانءَ گوشت کہ اے وھد ءَ مئے توان ءِ پیداواری استعداد 31ہزار میگا واٹ انت ایشی ءَ چہ 60درسد توان تیل ءُُ گیسءُُ کوئلہ ،30درسد توان آپ ،6درسد نیوکلیئر ءُُ4درسد دگہ وسیلگ چہ حاصل بوھگ انت۔آہاں گوشت کہ ٹرانسمیشن لائن ءَ را ھم گہتر جوڈ کنگ بوھگ انت، مٹیاری چہ لاہور ءِ تاں ٹرانسمیشن لائن ءِ جنئگ ءِ ھاترا مالیاتی معاملہا طے بوتگ ات،یک چہ 2 ماہ ءِ تہ ایشی بُن ھشت ایر کنگ بیت، گرڈ اسٹیشنز ءِ جاورگہتر کنگ ءِ ھاترا ھم گامگیج زورگ بوھگ انت ءُُ اے تک ءِ تہ زرکاری گیش کنگ بوھگ انت۔آہاں گوشت کہ حکومت ءَ پیسلہ کتگ کہ پیسکو، کیسکو، میپکو ءُُ لیسکو ءَ را گیش بھر ءُُ بانگ کنگ بیت تنکہ ایشی ءِ کارکردگی ءُُ ہزمتانی پھجارگ گہتر کنگ بیت۔ عمر ایوب خانءَ گوشت کہ بلوچستان ءِ ٹیوب ویلز ءَ راھم مہ شمسی توانائی ءِ سرا دیم دیگ انت،توان ءِ دُزی ءِ ھلاپ ءَ ابید پرک ءِ کارروائی کنگ بوھگ انت ءُُ کنڈا کلچر ءِ ھلاسی کنگ بوھگ انت۔آہاں گوشت کہ خیبر پختونخواءُُ دگہ دمگانی تہ توان ءِ دُزی ءِ ھلاپ ءَ جنز برجاہ بیت۔
