اسلام آباد۔ 26مارچ(اے پی پی) وزیر مملکت موسمیاتی بدلی زرتاج گل پارینے کہ اسلامی نظریاتی کونسل ملک اٹی ساف و سرسوز پاکستان پروگرام و 10 بلین ٹری سونامی پروجیکٹ نا فائدہ غاتے تالان کننگ نا چرجوئی ٹی غٹ مکاتب فکر انا عالم دین تا مخ تفی ءِ دوئی کننگ کن زوت کانفرنس اسے نا بست و بند ءِ کیک۔ سے شنبے نادے آ اے پی پی تون گپ و تران کرسا وزیر مملکت پارے کہ داچرجوئی ٹی اوصدر مملکت ڈاکٹر عارف علوی ءِ جندی حیثیت اٹ چھٹی اس راہی کرینے ہراٹی اوڑان راج انا دا بے کچ اہم تپہ ءِ سفائی ستھرائی و چاگڑد نا رکھ و مون آ دننگ نا پروگرام اٹی اوار کننگ کن گام گیج آتا خواست کرینے، داوڑ الس ءِ ساف و سرسوز پاکستان پروگرام نا بارواٹ آگاہی دوئی مریک و او دا بابت مثبت کڑد اس ادا کننگ کیرہ۔ زرتاج گل پارے کہ ملک انا سرکاری و نجی ادارہ غاک بشمول سول سوسائٹی وزیراعظم نا ساف و سوز پاکستان پروگرام 10بلین ٹری سونامی و چاگڑد نا رکھ و شونداری کن بناکروک آ ایلو پروگرام تیٹی بشخ ہلنگ ءُ۔ اوپارے کہ ماحولیات نا بشخ انا شونداری کن داسہ وخت ءِ کہ مذہبی تپہ ءِ ہم داکوشست آتا بشخ جوڑ کننگے۔ دا چرجوئی ٹی اسلامی نظریاتی کونسل نا کنڈآن عالم دین تا کانفرنس کمکار و فائدہ تروک جوڑ مریک۔
