اسلام آباد۔ 26مارچ(اے پی پی) وزیر مملکت موسمیاتی بدلی زرتاج گل پارینے کہ ساف و سرسوز پاکستان اسہ قومی ءُ پروگرام اسے ، داٹی سرکاری و نجی بشخ انا اوار مننگ است بڈ ءِ، وزارت موسمیاتی بدلی و پاکستان ٹیلی کمیونیکیشن (پی ٹی سی ایل) نا نیام اٹ مفاہمت نا سمجھوتہ دا اہم قومی مسخت نا دوئی کننگ نا کنڈا اہم ءُ پیش رفت اسے۔ اوسے شنبے نادے آ وزارت موسمیاتی بدلی و پاکستان ٹیلی کمیونیکیشن (پی ٹی سی ایل) نا نیام اٹ مفاہمت نا یات داشت آ دستخط کننگ نا دود آن تران کریکہ۔ اوپارے کہ ساف و سرسوز پاکستان وزیراعظم عمران خان نا ویژن ءِ و او ملک ءِ زیات خرن ، ساف و چاگڑد دوست ہُننگ خواہک ، دامسخت کن مچ آ ملک اٹی جنگلات آتا بے تک کاٹ کننگ ءِ توننگ تون اوار اوار زیات آن زیات شجر کاری نا کمک اٹ اونا رقبہ ءِ ودفنگ کن گام گیج کننگ انگ ءِ۔ وزیر مملکت پارے کہ ننے دا قومی و انسانی مسخت کن نجی بشخ انا کمکاری بھاز اہم ءِ ، و پی ٹی سی ایل نا دا پروگرام اٹی اوار مننگ اونا عکاس ءِ ۔ اوپارے کہ پی ٹی سی ایل نا 3ہزار رضاکارآتا ٹیم السی شرحالی نا چندی کاریم تیٹی متاماری کننگ ءُ۔ زرتاج گل پی ٹی سی ایل نا کنڈآن آغا شاہی ایونیو، چاندتارہ چوک و لاہور نا جاگہ سے آ شجر کاری نا سلاہ نا ستاءِ کرساپارے کہ پی ٹی سی ایل نا راجی زمواری نا پروگرام اہم ءِ نن خوانہ کہ دا پروگرام شجر کاری کن بایدے جتا مرے۔ اوپارے کہ چاگڑد نا رکھ اکن میڈیا نا کڑد بھاز اہمءِ و دا حکومت نا ساف و خرن پروگرام ءِ جوان وڑاٹ تالان کرینے۔ داوخت آ پی ٹی سی ایل نا چیف ایگزیکٹو آفیسر راشد خان دود انا بشخ ہلوک آتے حکومت نا ساف و سرسوز پاکستان پروگرام نا مناسبت اٹ کمکاری نا حکمت عملی آن معلومدار کرے۔ داوخت آ وزارت موسمیاتی بدلی نا ایڈیشنل سیکرٹری بابر حیات تارڑ ساف و سرسوز پاکستان پروگرام نا بارواٹ پارے کہ داٹی دہ بلین ٹری سونامی آن بیدس ویسٹ مینجمنٹ ، کنوئی ءُ ساف دیر انا فراوانی و جم سفائی و ستھرائی آ ہم چکار کننگک۔
