اسلام آباد۔ 26مارچ(اے پی پی) واپڈ امہمند ڈیم ہائیڈرو پاور پروجیکٹ نا جوڑ کننگ کن سول و الیکٹرو مکنیکل ورکس انا ٹھیکہ ءِ اِرا جوڑ جاڑی کمپنی تیا تالان جوائنٹ ونچر ءِ تسنے۔ چائنا گزوبہ گروپ آف کمپنیز جوائنٹ ونچر نا مرکزی فرم ءِ وخت اس کہ پاکستانی فرم ڈیسکون شریدار ءِ۔ ایوارڈ کروک آ گڈیکو کنٹریکٹ نا مالیت 183ارب 52کروڑ 30 لکھ روپئی ءِ ہراٹی پی سی ون نا مقابلہ ٹی 18 ارب روپئی نا بچت مس۔ داہیت قابل ذکر ءِ کہ واپڈا بھلووخت اسے آن ہرے مننگ نا گواچی مہمند ڈیم ہائیڈرو پاور پروجیکٹ نا جوڑ کننگ اٹ بروک آ غٹ کانودی ، مالی و تکنیکی سختی تے مر کننگ اٹ سرسہب مسنے۔ مہمند ڈیم انا جوڑ کننگ نا معاہدہ غا دستخط نا دود واپڈ اہاؤس اٹی اڈ ہلک۔ واپڈ ا و جوائنٹ ونچر نا مجاز کمامدارآک معاہدہ غا دستخط کریر۔ چیئرمین واپڈا لیفٹیننٹ جنرل (ر) مزمل حسین، واپڈا باسک، سینئر آفیسر ، پروجیکٹ انتظامیہ و جوائنٹ ونچر نا بڑزکو کمامدارآک ہم دود اٹی ساڑی ئسر۔ دود انا بشخ ہلوک آتیان گپ وتران کرسا چیئرمین واپڈا پارے کہ مہمند ڈیم پاکستان نا واٹر ، فوڈ و انرجی سیکورٹی ٹی اہم کڑد اس ادا کیک۔ اوپارے کہ واپڈا نا کوشست مریک کہ ڈٹ ءِ زوت آن زوت پورو کننگے تانکہ ملک اٹی دیر و بجلی نا ترندی اٹ ودوک آ گرج آتے پورو کننگ مرے۔ اواومیت ظاہر کرے کہ مہمند ڈیم آن ننا اقتصادی حالیت سوگو مریک۔ پروجیکٹ ایریا ٹی معاشی و راجی شون بریک۔ خلقت ءِ روزگار نا وارخواہی ملک و نیزگاری ٹی کمتی مریک۔ مہمند ڈیم اسہ تاریخی ءُ و جتا ءُ ڈٹ اسے ہرا خیبر پختونخوا نا قبائلی ضلع مہمند نا مر مر انگا علاقہ غاتے ٹی دریائے سوات آ جوڑ کننگ انگ ءِ۔ پروجیکٹ پنچ سال و ہشت تُو اٹی پورو مریک۔ پوروی آ مہمند ڈیم اٹی دیر کوڑی کننگ نالائخی جم وڑاٹ 1.2 ملین ایکڑ فٹ مریک، 800 میگاواٹ اڑزان پن بجلی ودی مریک و اوڑتون اوار پشاور، چارسدہ و نوشہرہ نا علاقہ غاتے ٹی جلاب نا توننگ مننگ کیک۔ مہمند ڈیم اٹی کوڑی کروک آ دیر آن اسہ لکھ 60 ہزرا ساڑی ڈغار تیان بیدس کم و ود 16ہزار 700 ایکڑ پوسکن آ ڈغار ہم سیراب مریک وخت اس کہ پشاورءِ ہردے 300 ملین گیلن دیر ہم کُننگ کن تننگک۔ ڈٹ آن ہر سال کم و ود 51ارب 60 کروڑ روپئی نا بریبر فائدہ دوئی مریک۔
