اسلام آباد۔ 26مارچ(اے پی پی) اسپیکر قومی اسمبلی اسد قیصر پارینے کہ پاکستان و قزاخستان نا نیام اٹ خوشگوار تعلقداریک ساڑی ءُ ہرامذہب ، ایلمی، تاریخ و دودوربیدگ نا سوگو بنداو تیا گنڈوک ءُ، داخیال آتا درشانی ءِ او سے شنبے نادے آ قزاخستان نا سفیر سیدیکو بارلیبے تون پارلیمنٹ ہاؤس اٹی اوڑدہی کرے۔ اوڑدہی ٹی ہڑتوم آ کنڈآتا تعلقداری، ڈیہہ نا حالیت و تین پہ تینی است خواہی نا ایلو معاملہ غاتیا گپ و تران کننگا۔ داوخت آ اسد قیصر پارے کہ پاکستان قزاخستان تون تینا تعلقداری تے پارلیمانی و اقتصادی کمکاری ءِ مون آ دننگ نا کمک اٹ ودفنگ نا است خواہ ءِ، ہڑتوم آ ملک آتے ٹی واپار، دفاع، سیل و سوات، کشت وکشار و ایلو بشخ آتے ٹی کمکاری ءِ مون آ دننگ نا بھلو وارخواہی اس ساڑی ارے۔ اوپارے کہ پاکستان نا ساڑی حکومت ملک اٹی زرکار دوست پالیسی درستی راستی کرفنگ ءِ ہرافتیان قزاخستان نا زرکار آک فائدہ ہرفنگ کیرہ۔ ہڑتوم آ ملک آتا پارلیمنٹ نا باسک آک ہڑتوم آ کنڈآتا تعلقداری تے سوگو کننگ اٹ اہم ءُ کڑد اس ادا کننگ کیرہ۔ اوپارے کہ ہڑتوم آ ملک آتا پارلیمان تا نیام اٹ رابطہ غاتے مون آ دننگ کن پاکستان نا قومی اسمبلی ٹی پاک ۔ قزاخستان فرینڈ شپ پڑک اس جوڑ کننگانے۔ سی پیک آن ڈیہہ ٹی شونداری نا بھلو وارخواہی اس ساڑی ءِ ۔ نیامی ایشیائی ملک آک داڑان بایدے فائدہ ہرفر۔ داوخت آ قزاخستان نا سفیر پارے کہ پاکستان ڈیہہ نا اسہ اہم ءُ ملک اسے و قزاخستان پاکستان تون تینا دوستانہ تعلقداری تے بھاز اہمیت ایتک۔ اوپارے کہ قزاخستان نا حکومت راجی و اقتصادی بشخ آتے ٹی پاکستان تون کمکاری ءِ مون آ دننگ نا است خواہ ءِ۔ اوپارے کہ ڈیہہ ٹی شونداری و شونہالی نا مون آ دننگ و امن وسلامتی کن پاکستان نا کڑد ستاکڑزک۔ قازق سفیر پارے کہ پارلیمانی سفارتکاری ہڑتوم آ قوم تے خڑک اتنگ اٹ اہم ءُ کڑد اس ادا کننگ کیرہ۔ قزاخستان نا سفیر اسپیکر اسد قیصر ءِ یورو ایشیاء اسپیکرز کانفرنس اٹی بشخ ہلنگ کن سلہ نامہ اس پیش کرے۔ اسپیکر کانفرنس اٹی بشخ ہلنگ آ رضامندی ظاہر کرے۔
