اسلام آباد۔ 26مارچ(اے پی پی) سپریم کورٹ مسکوہی وزیراعظم نواز شریف نا طبی بنداو تیا 6ہفتہ کن ضمانت ءِ منظور کرسا پارینے کہ نواز شریف ملک آن پیشن ہِننگ کپک ، عدالت 50 لکھ روپئی نا مچلکہ غاتا عوض ضمانت ءِ منظور کرے۔ داکان مست چیف جسٹس آصف سعید کھوسہ نا کماشی ٹی مسہ باسکی بنچ کیس انا سماعت ءِ کرے ہراٹی محمد نواز شریف نا وکیل خواجہ حارث دلیل ترسا موقف تینا کرے کہ نواز شریف نا جان جوڑی نا بابت 5میڈیکل بورڈ جوڑ کننگاسس ، غٹ اونا درمان نا سفارش ءِ کرینو۔ خواجہ حار ث دلیل ترسا پارے کہ نواز شریف نا طب بھاز خراب ءِ ہنداخاطران اونا جان جوڑی نا سنگینی ءِ مون آ تخسا اونا ضمانت ءِ منظور کننگے۔ اوعدالت ءِ پارے کہ نواز شریف ءِ پورو درمان کن 8 ہفتہ نا ضمانت آ یلہ کننگے۔ چیف جسٹس اودے پارے کہ اگہ اونا ضمانت ءِ منظور کننگے تو او ہراوڑ پدی بریک ہراڑا فاضل وکیل پارے کہ محمد نواز شریف ملک آن پیشن ہِننگ خواپک بلکن ملک اٹی مرضی اٹ ڈاکٹر آن درمان کرفنگ خواہک۔ عدالت نا استفسار آ خواجہ حارث پارے کہ نواز شریف داوخت آ ذہنی تناؤ نا گواچی ءِ ، ضمانت آ یلہ کننگ آن پد او درمان تون اوار اوار ڈپریشن ءِ ہم مر کننگ خواہک۔
